Dowladda Soomaaliya oo shaacisay kiisas cusub oo Coronavirus ah

MUQDISHO, Soomaaliya – Wasaarada Caafimaadka dowladda federaalka ah ee Soomaaliya ayaa shaacisay in ay xaqiijisay laba kiis horleh oo ku saabsan Coronavirus, taas oo wadarta guud ka dhigeysa todoba.

Labada kiis ee cusub ayaa midkood waxaa laga helay qof ajnabi ah, halka shaqsiga kale uu yahay muwaadi, sidda ku xusan bayaanka.

War-saxaafadeedka ayaa lagu sheegay in hal ruux uu kasoo kabtay xanuunka, isla markaana aysan illaa iyo haatan jirin qof u geeriyooday.

Tani ayaa ka dhigan in tirada ajaaniibta uu soo ritay cudurka ee ku sugan Muqdisho ay gaareyso saddex, iyaddoo midkood uu yahay ajnabi la shaqeeya xafiiska Qaramada Midoobay ee magaala madaxda dalka.

Inkastoo xukuumada Muqdisho ay su’aal gelisay, Somaliland ayaa horey ugu dhawaaqdey in laba kiis oo midkood laga helay ruux u dhashay China, oo ah dalka uu asal ahaan kasoo bilowday caabuqaas dilaaga ah.

Marka lagu daro tirada Somaliland sheegatay, wadarta guud ee kiisaska fayruska ee ka jira Soomaaliya ayaa waxay gaareysaa sagaal kiis.

Dowladda Puntland oo ku adkeysatay in aysan wali helin wax kiis ah ayaa sheegtay in ay baaritaan ku waddo shaqsiyaad lagu tuhmay cudurka oo qeybtood dheecaanadooda loo diray dibada si loosoo hubiyo.

Soomaaliya ayaa nan haysan sheybaarka lagu ogaado Covid—19, waxaana dalku isticmaalaan mid yaala caasimada Nairobi ee dalka Kenya, wallow la rajeynayo in todobaadka soo aadan laga soo dejiyo Muqdisho.

GAROWE ONLINE