Gollaha Shacabka oo fariin u diray Xukuumadda iyo dowlad-goboleedyada

MUQDISHO, Soomaaliya - Dagaal beeleedka kasoo cusboonaatey degaanka Dhumay ee duleedka Laascaanood ayaa waxay ahareysay fadhigii maanta ee Gollaha Shacabka ee Baarlamaanka Federaalka Soomaaliya.

Gudoomiyaha Gollaha, Maxamed Mursal Sheekh Cabdiraxmaan ayaa gaba-gabadii kulanka ka akhriyay baaq nabadeed oo ku aadan Colaadda Dhumay, isagoo fariin sidoo kale u diray Xukuumadda Soomaaliya iyo dowlad-goboleedyada.

"Baarlamaanka Federaalka ah ee Soomaaliya waxa uu aad uga xun yahay colaadda soo noq-noqtey ee Koonfurta gobolk Sool, Golluhu wuxuu ugu baaqayaa beelaha walaalaha ah inay deg deg u joojiyaan colaadda," ayuu yiri Mursal.

Waxa uu gudoomiyaha ugu baaqay Ismida, culimada iyo waxgaradka Soomaaliyeed inay u istaagaan sidii loo demin lahaa dagaalka Beelaha walaalaha ah ku dhexmraya Dhumay, kaasi oo ay ku dhinteen 50 qof.

Ugu dambeyntii, Gollaha Shacabka ayaa usoo jeediyay Xukuumadda Soomaaliya iyo dowlad-goboleedyada dalka inay kaalin mug leh ka qaataan joojinta colaadda Koonfurt gobolk Sool.

Baaqan ayaa ku biiraya baaqyo kale oo ay jeediyaan Xukuumadda Soomaaliya, Puntland iyo Somaliland, iyadoo aan la ogeyn in hadallada lagu qorey war-saxaafadeedyada ay demin karaan colaadda sokeeye.

GAROWE ONLINE