Goobaha uu Coronavirus "kasoo geli karo" Soomaaliya oo la shaaciyey

MUQDISHO, Soomaaliya – Dowladda federaalka Soomaaliya ayaa waxay ku dhawaaqdey "meelaha laga cabsi qabo" in waddanka uu kasoo galo caabuqa sidda fudud ku faafa misana dilaaga ah ee Coronavirus.

Cabdullaahi Xaamud, wasiiru dowlaha xafiiska ra'iisul wasaaraha, ayaa Arbacada maanta ah hadalkaan ka dhawaajiyey.

"Kadib qiimeyn, meelaha waaweyn ee annaga khatarta naga soo geli karto waa [garoomada diyaaradaha], doonyaha, badda iyo xuduudaha," ayuu ku sheegay wareysi uu siiyey Telefishinka Qaranka.

Xukuumadda ayuu hoosta ka xariiqay in ay dardargelisay qorsheyaal ay kaga hortageyso in dalka uu soo gaaro xanuunkaas.

"Waxaan ogaanay in ay aad u fududahay in uu diyaaradaha naga soo gaaro cudurka, marka waxaan rabnaa in aan ahmiyadda saarno meelaha uu naga soo geli karo; Hargeysa, Garowe, Boosaaso, Baydhabo, Kismaayo iyo magaalada Muqdisho," ayuu raaciyey.

Saaxiibada caalamka ayuu ku tartarsiiyey in ay ka taageeraan Soomaaliya siddii ay kaga hortagi lahayd halistaas caalamiga ah.

Soomaalida ku nool dalalka laga helay cudurka ayuu ku waaniyey in ay muujiyaan "taxadar dheeraad ah" isla markaana hadii ay dalka kusoo laabanayaan ay iska xaqiijiyaan in ay qabaan cudurkaas.

Wasaaradda Caafimaadka Soomaaliya ayaa mar sii horeysay daaha ka rogtay in waddanka uusan kamid ahayn dalalka u nugul in uu soo gaaro Coronavirus oo laga xaqiijiyey in ka badan 60 kale oo caalamka ah.

GAROWE ONLINE