Iran oo isku-day Shiiceyn "ka sameysay" Soomaaliya
-
WARIYAHA MUQDISHO GAROWE ONLINE
- Posted On 13-06-2021, 03:27AM
MUQDISHO, Soomaaliya - Madaxweynihii 8aad ee Soomaaliya, Xasan Sheekh Maxamuud, ayaa sharaxay go'aankii dowladiisa ay xiriirka ugu jartay Iran sanadkii 2016-kii kaasoo dood badan dhaliyey.
Isaga oo ka qeybgalayey aragti-wadaag Garowe Online uu xalay ku marti-geliyey Twitter-ka, Xasan ayaa beeniyay in go'aankaas uu ku yimid codsi kaga yimid boqortooyada Sacuudiga.
"Waxaan u ceyrinay howlgalka diblumaasiga ee Iran in waddanka ay waddeen Shiiceyn," ayuu ka dhawaajiyey hogaamiyaha xisbi siyaasadeedka Midowga Nabadda iyo Horumarka.
Sida laga soo xigtey Xasan oo hadda musharax u ah xilka ugu sareeya Jamhuuriyada Soomaaliya, xukuumada Tehran waxay shaqaddaas u soo dhexmsrtay barnaamijyadda samafalka.
"Go'aankaas wuxuu ku saleysanaa cadeymo - codad iyo muuqaalo ay keeneen koox kamid ah hay'adeena sirdoonka," ayuu ku daray, isaga oo qiray in ay kalkii hore xogta u soo dusiyeen dowladdo.
Xasan Sheekh oo tibaaxay in siyaasada maamulkiisa ee arrimaha dibadda ay ahayd in dalku uusan cadow dibada ah yeelan ayaan shaaca ka dhigin dowladaha macluumaad u soo dusiyey.
"Annaga oo hadda oo wadda Sunni ah ayaa qabiil isku haysana - haddii Shiico iyo Suni loo kala baxo - khatarta ka dhalan karta aad bay u sareysaa," ayuu hoosta ka xariiqay Xasan Sheekh.
Ugu dambeyntii, Xasan oo rumeysan in itaal-darida Soomaaliya haysata ay tahay in aysan jirin wada-ogol, siyaasad iyo ka go'naanshiyo ayaa xusay faragelinta dibada jireyso inta dalku jilacsan yahay.
GAROWE ONLINE
