Jubaland oo diiwaan-gelisay kiisaskii ugu horeeyay oo ah Covid-19

KISMAAYO, Jubaland – Guddiga ka hortagga Coronavirus ee Jubaland ayaa ku dhawaaqay kiisaskii ugu horeeyay oo fayruska safmareenka ah ee Corona.

Maxamed Warsame Darwiish, wasiirka arrimaha gudaha maamulkaas ahna gudoomiyaha guddiga, ayaa sheegay in xaaladaha laga helay Kismaaayo.

Isagoo hadalkiisa sii wata, Mr Darwiish ayaa shaaca ka dhigay in shaqsiyaadka oo laba ah ay haatan ku karantiilan yihiin Isbitaalka guud ee magaaladda.

"Labadaan ruux ayaa noqonaaya kuwii ugu horreeyay ee la xaqiijiyay in ay qabaan xanuunka COVID-19 ee kusugan meel kamid ah dowlad goboleedka Jubbaland," sidaas waxaa baahiyey telefishinka ku hadla afka dowlad goboleedkaas.

Jubaland ayaa noqoneysa maamul goboleedkii saddexaad ee kamid ah Soomaaliya ee degaanadiisa uu dad kusoo rito caabuqaas dilaaga ah.

HirShabelle iyo Somaliland ayaa kasii horeeyay, balse Puntland waxaa laga waayey dhowr qof oo laga baarey isla markaana laga qaadey dheecaanadii.

Wasaaradda Caafimaadka federaalka ayaa horey u shaacisay in ay xarumaha maamulada ka dejisay qalabka lagu baaro xanuunka kadib markii ay soo iibisay.

GAROWE ONLINE