Jubbaland oo amar kusoo rogtay shirarka lagu qabanayo Kismaayo

KISMAAYO, Jubbaland - Madaxweynaha Jubbaland, Axmed Maxamed Islaam ayaa maanta oo Khamiis ah, 19 September 2019, shir gudoomiyay kulanka Golaha Wasiirada.

Kulanka ayaa looga hadlay arimo kala duwan sida nabadgalyada, waxaana la isku raacay in dhamaan shirarka iyo kulamo ruqsad la'aan ah aan lagu qaban karin Kismaayo laga bilaabo 20 bishan.

Ciidamadda ammaanka ayay wasiiradu si wadar ogol ah isugu raaceen in ay muhiim tahay in amar lagu siiyo in ay galaan heegan ayna muujiyaan feejignaan buuxda.

Sidoo kale waxaa kulanka lagaga hadlay howlaha ay hormuudka ka tahay Wasaarada Arimaha Gudaha Jubbaland ee la xiriira dhamaynta tabashooyinkii ka dhashay Doorashadii Madaxweynaha ee 22 Ogoosto.

"Golaha Wasiiradda Jubbaland ayaa bogaadiyay sida howlahaas ay Wasaaradu ilaa hada u wado guulaha badana looga gaaray," ayaa lagu yiri qoraal kasoo baxay shirkaas.

Ugu danbayn, waxay isl ameel-dhigeen in xaalado dhinaca nolosha ah ay ka jiraan deegaanada Jubbaland kuwaas oo u baahan gurmad deg deg ah, wallow aanan la fahfaahin.

"Waxaana la faray dhinacyada ku shaqada leh inay warbixino dhamaystiran ka keenan oo lagu howlgalo," ayaa lagu soo gabagabeeyay qoraalka oo uu arkay Garowe Online.

GAROWE ONLINE