Kala qaybsanaanta Hirshabeelle oo sii xoogeysanaysa: JSP oo taageertay Cali Guudlaawe

BELEDWEYNE, Soomaaliya — Kala qaybsanaanta siyaasadeed ee Hirshabeelle ayaa sii xoogeysanaysa, kadib markii Xisbiga JSP uu si rasmi ah Madaxweyne Cali Guudlaawe ugu magacaabay musharraxiisa u taagan hoggaanka maamulka Hirshabelle, halka siyaasiyiin, waxgarad iyo bulshada Gobolka Hiiraan ay si adag uga horyimaadeen qorshaha doorashada.

JSP, oo ah xisbiga Xasan Sheekh, ayaa Guudlaawe u aqoonsaday musharraxa xisbiga ee doorashada madaxtinimada Hirshabeelle, tallaabadaas oo sii xoojisay loollanka siyaasadeed ee ka taagan labada gobol ee uu maamulka ka kooban yahay.

Hase yeeshee, siyaasiyiinta iyo waxgaradka Hiiraan ayaa sheegay in aysan aqbali doonin in doorasho laga qabto deegaannada gobolka iyadoo aan marka hore laga gaarin heshiis siyaasadeed oo ku saabsan hannaanka doorashada iyo mustaqbalka maamulka Hirshabeelle.

Magaalada Beledweyne waxaa si gaar ah uga soo baxay diidmo xooggan oo ku aaddan musharraxnimada Guudlaawe, iyadoo qaar ka mid ah siyaasiyiinta iyo odayaasha dhaqanka ay ku adkeysanayaan in aan la qaban karin doorasho aan heshiis guud laga gaarin.

Khilaafka ayaa sidoo kale muujinaya kala aragti duwanaanshaha sii xoogeysanaya ee u dhexeeya reer Hiiraan iyo Xasan Sheekh, iyadoo muddooyinkii dambe ay jireen muranno la xiriira awood-qaybsiga, maamulka iyo qaabka loo qabanayo xilalka sare.

Dowladda Federaalka ee mudo-xileedkeedu dhamaadey, ayaa ku adkeysanaysa qorshaheeda ah in doorashooyin laga qabto Hirshabeelle iyo Galmudug, iyadoo doorashooyinka maamul-goboleedyada qaar laga diiday doorashadda Villa Somalia wado.

Laakiin mucaaradka siyaasadeed iyo qaar ka mid ah bulshada Hiiraan ayaa qaba in doorasho aan lagu heshiin ay sii kordhin karto khilaafka, isla markaana ay dhaawici karto sharciyadda maamulka ka dhalan kara.

Taageerada JSP ee Guudlaawe ayaa sidaas darteed ku soo beegmaysa xilli ay dowladda Federaalka ee mudo-dhaafka ah dooneyso inay dardar geliso qorshaheeda doorasho, halka dhinacyo badan oo Hiiraan ah ay dalbanayaan wadatashi iyo heshiis siyaasadeed oo ka horreeya codeynta.

Haddii aan la helin heshiis, maamulka Hirshabeelle iyo dhinacyada siyaasadeed iyo kuwa dhaqanka ee Hiiraan, waxaa suuragal ah in qorshaha doorashada uu wajahdo caqabado hor leh.

Guudlaawe ayaa hadda haysta taageerada rasmiga ah ee JSP, balse musharraxnimadiisa ayaa wajahaysa diidmo xooggan oo ka timid Hiiraan, taasoo ka dhigaysa tartanka madaxtinimada Hirshabeelle mid si weyn u kala qaybsan.

Khilaafka ka taagan doorashada ayaa sidoo kale qayb ka ah xiisadda siyaasadeed ee ka jirta Soomaaliya, iyadoo dowladda Federaalka waqtigeedu dhamaadey iyo mucaaradku ay isku hayaan hannaanka doorashada, wax-ka-beddelka dastuurka iyo waqtiga doorashooyinka.

Hirshabeelle ayaa sidaas ku wajahaysa marxalad xasaasi ah, iyadoo su’aasha ugu weyn ay tahay in dhinacyada isku haya ay gaari karaan heshiis siyaasadeed ka hor inta aan la bilaabin doorashada, ama in khilaafka hadda jira uu sii horseedi doono kala fogaansho siyaasadeed oo cusub.

GAROWE ONLINE