Khilaafkii Museveni iyo Xasan Sheekh oo Saameyn Ku Yeeshay Xiriirka Labada Dal - XOG

Muqdisho – Dowladda Federaalka Soomaaliya ayaa isku dayday inay hesho jadwal booqasho rasmi ah oo Xasan Sheekh ku tago Uganda intii uu ku jiray socdaalkiisii diblomaasiyadeed ee dhawaan ku tagey dalalka ciidamada ka jooga Soomaaliya, balse dadaalladaasi weli ma miro-dhalin, kadib markii uu xumaaday xiriirka la sheegay inuu soo kala dhex galay labada hoggaamiye, sida ay sheegeen ilo wareedyo xog ogaal ah.

Sida ay ilo wareedyo ka tirsan Villa Somalia sheegeen, dowladda Federaalka ayaa dooneysay inay qabanqaabiso booqasho rasmi ah oo Xasan Sheekh ku tago Uganda, xilli uu socdaal ku marayay dalalka ciidamada ku leh Soomaaliya. Ilo wareedyadu waxay sheegeen in socdaalkaasi uu qeyb ka ahaa dadaallo diblomaasiyadeed oo lagu muujinayay taageerada dalalka gobolka, isla markaana lagu yareynayay saameynta go'aanka Mareykanka ee lagu joojinayo taageerada ciidamada shisheeye ee ka howlgala Soomaaliya.

Ilo wareedyadu waxay sheegeen in xiriirka Xasan Sheekh Maxamuud iyo Madaxweynaha Uganda, Yoweri Museveni, uu hoos u dhacay kadib kulan dhacay 10-kii May, markaas oo Museveni uu la sheegay inuu dhiggiisa Soomaaliya ku boorriyay inuu wada-hadal la yeesho mucaaradka siyaasadda, isla markaana uu u bandhigay inuu ka gacan siiyo sidii loo gaari lahaa is-afgarad la xiriira arrimaha doorashooyinka ka hor marxaladda kala guurka siyaasadeed.

Sida ay ilo wareedyadu sheegeen, Madaxweyne Museveni waxaa kulanka ku wehliyay wiilkiisa oo ah taliyaha ciidamada Uganda. Waxay intaas ku dareen in qaar ka mid ah xubnihii wafdiga dowladda Federaalka ee Madaxweynaha la socday ay diideen soo-jeedintaas, arrintaas oo la sheegay inay ka careysiisay Museveni iyo wiilkiisaba.

Tan iyo markaas, laba ka mid ah la-taliyeyaasha ugu awoodda badan Madaxweyne Xasan Sheekh iyo mid ka mid ah wasiirrada sare ee sida dhow ula shaqeeya ayaa isku dayay inay dib u hagaajiyaan xiriirka kala dhexeeya Kampala, balse dadaalladaas ayaan weli wax natiijo ah dhalin, sida ay sheegeen ilo wareedyadu.

Ilaa iyo hadda, Madaxtooyada Soomaaliya iyo dowladda Uganda midna si rasmi ah ugama hadlin dadaallada diblomaasiyadeed ee la sheegay iyo khilaafka la sheegay inuu soo kala dhex galay labada dhinac.

GAROWE ONLINE