Madaxtooyada Turkiga oo gudbisay mooshin saameynaya Soomaaliya

ANKARA, Turkey – Madaxtooyadda Turkiga ayaa shalay baarlamaanka dalkaas u gudbisay mooshin qeyb ahaan saameynaya biyaha Soomaaliya.

Mooshinkaas ayaa ku saabsan in muddo kordhin loo sameeyo ciidamadda ka jooga Gacanka Cadan, biyaha Soomaaliya iyo Badda Carab.

Xeer-dejinta ayaa ka doodi doonta soo jeedintaas maanta oo Arbaco ah, waxaana qorshuhu yahay in kadib ay cod u qaadaan.

Sidda ku xusan mooshinka, muddo kordhinta ayaa waxaa la doonayaa in ay bilaabato 10-ka bishaan Janaayo, sanadka 2020-ka.

Muddo kordhinta ayaa ah hal sano, taasoo la macno ah in ay dhameyn doonto 10-ka Febraayo sanadka soo aadan ee 2021-ka.

Sanadkii 2008-dii ayay ahayd markii ugu horeysay oo mooshin noocaan ah loo gudbiyey baarlamaanka Turkiga. Tani macnaheedu waxay tahay in 12-jeer la kordhiyey tan iyo xiligaas.

Biyaha Soomaaliya waxaa ku sugan ciidamada dalal kala duwan, kuwaasoo ogolaanshiyo ka haysta Qaramada Midoobay, isla markaana waajibaadkooda la dagaalanka burcad-badeeda.

Turkiga ayaa quudareynaya in muddo kordhintaan cusub uu kaga faa'iideysto in uu biyaha Soomaaliya kusoo daabulo maraakiib iyo diyaarado dagaal.

GAROWE ONLINE