Mareykanka oo dib u bilaabay kaalmada Ciidamadda Soomaaliya

MUQDISHO, Soomaaliya – Mareykanka ayaa shaaciyey in asbuucaan uu dib u bilaabay taageerada Ciidamada Soomaaliya, talaabadaas oo uu ku xoojinayo howlgalada argagixiso la dirirka ee Shabeellaha Hoose.

Ryan Grizzle, afhayeenka safaarada Mareykanka ee Muqdisho, oo warkaan ku dhawaaqay ayaa sababta ku sheegay dib-u-habeyn lagu sameeyay maamulka maaliyada hogaanka Ciidamada Xoogga.

"Talaabadaas waxay sarre u qaadey kalsoonida uu Mareykanka ku qabo in uu isla xisaabtan ku sameeyo deeqaha uu bixiyo," ayuu raaciyey Grizzle.

Dowladda federaalka ayuu ku waaniyey in ay xooga saarto dib-u-habeynta Hay'addaha Ammaanka si gaar ah maamulka iyo Khayraad, arrintaasna ay qayb ka tahay dhismaha ciidan xirfad leh oo lagu xisaabtamo.

"Iyadoo arrimaha socda ee dib u habeynta Ciidamadda ay muhiim yihiin, Mareykanka wuxuu sii wadayaa taageerida howlgalada ciidamada ee diirada saaraya wiiqitaanka argagixisadda," ayuu xusay.

Ugu dambeyntii, xukuumadda Soomaaliya iyo maamul goboleedyadda ayuu soo jeediyey in heshiiyaan isla markaana dib u bilaabaan wadashaqeynta.

Sanadkii 2017-kii ayay ahayd markii Mareykanka uu joojiyey taageerida Ciidamadda Xoogga Soomaaliya ee saadka iyo sahayda "kadib markii ay u cadaatey in musuqmaasuq baahsan lagu sameeyay kaalmo uu siiyey ciidanka".

GAROWE ONLINE