Dagaalameyaal ka tirsanaa Al-Shabaab oo duqeyn lagu laayey
-
WARIYAHA MUQDISHO GAROWE ONLINE
- Posted On 10-04-2020, 04:10PM
MUQDISHO, Soomaaliya – Taliska Milatariga Mareykanka ee Afrika ayaa soo wariyey in duqeymo ay ka fuliyeen koonfurta Soomaaliya ay ku dileen 11 dagaalame oo ka tirsanaa Al-Shabaab.
Sidda ku xusan war-saxaafadeedka AFRICOM, howlgalada oo ahaa kuwa is-difaac ah markii lagu soo qaadey weerar gaadmo ah ayaa la fuliyey 10-ka bishii April ee sanadkan 2020.
Weerarka koowaad oo ka dhacay nawaaxiga degaanka Kobon kuna dhow Baar Sanguuni ee gobolka Jubada Hoose waxaa ku dhintay 10 dagaalame.
Duqeynta labaad oo ka dhacday agagaarka magaalada Jilib ee gobolka Jubada Dhexe waxaa ku geeriyooday hal dagaalame, sidda ku cad warka qoraalka ah.
"Illaa iyo haatan, ma hayno wax khasaaro ah oo duqeynta kasoo gaarey dad shacab ah, hadii ay soo baxaan waxaan diyaar u nahay in aynu baarno," ayaa lagu yiri bayaanka.
Marka laga soo tago sheegashada Mareykanka, ma jiro wax war ah oo ku saabsan dhaqdhaqaaqaan oo kasoo baxay xoogaga gacansaarka la leh shabakada argagixisadda ah ee Al-Qaacida.
Tan iyo weerarka bishii Janaayo ee sanadkan ay Al-Shabaab ku qaadey xerada Manda Bay ee milatariga Mareykanku ku leeyahay Kenya, waxaa kordhay duqeymaha lagula beegsanayo Soomaaliya.
GAROWE ONLINE
