Qoorqoor oo kormeeray dhul laga xoreeyay Al-Shabaab

DHUUSAMAREEB, Galmudug - Madaxweynaha Galmudug, Axmed Cabdi Kaariye, ayaa wuxuu maanta kormeer ku tagay goobihii laga xoreeyay kooxaha argagaxisada ah ee Shabaab.

Qoorqoor ayaa safar dheer oo dhulka ah kaga ambabaxay magaalada Gaalkacyo ee gobolka Mudug asagoona gaaray galinkii hore ee maanta magaalada Wisil ee Gobolka Mudug.

Saraakiisha ciidamada qalabka sida ee howlgalada ka wada halkaas ayaa madaxweynaha kusoo dhaweeyay Wisil waxaana halkaas warbixin kaga dhageystay.

Sidoo kale, madaxweynaha oo safarkiisa sii wata ayaa kormeer ku sii maray deegaano ka tirsan Bacadweyne asagoona ugu danbeyntii tagay Degmada Bacadweyne oo ciidamada qalabka sida ay dhawaan ka xoreeyeen kooxaha khawaarijta ah ee nabaddiidka ah.

Ugu dambeyntii, Qoorqoor oo ay wehliyaan Wasiirka Amniga Galmudug iyo saraakiisha ciidamada qalabka sida ayaa galinkii danbe ee maanta kormeerkiisa kusoo afmeeray Degmada Camaara iyo deeganada hoos yimaada oo "dhawaan laga sifeeyay kooxaha Nabaddiidka ah".

GAROWE ONLINE