Shacabka Muqdisho oo loo oggolaaday inay Codkooda ku soo doortaan Madaxda Degmooyinka

MUQDISHO — Wasaaradda Arrimaha Gudaha Soomaaliya ayaa sheegtay in doorashada guddoomiyeyaasha degmooyinka gobolka Banaadir ay bilaaban doonto kaddib fasaxa Ciidda Carafo, iyadoo xubnaha cusub ee goleyaasha deegaanka ay dooran doonaan hoggaanka degmooyinka iyo ku-xigeennadooda.

Wasiirka Arrimaha Gudaha Soomaaliya, Cali Xoosh, ayaa qorshahan ku dhawaaqay xilli uu ka hadlayay tababar loo qabanayay xubnaha cusub ee goleyaasha deegaanka oo ka dhacay magaalada Muqdisho.

Wasiirka ayaa sheegay in doorashooyinkani ay qayb ka yihiin dadaallada lagu dhameystirayo nidaam dowladeed oo dimuqraadi ah isla markaana isla xisaabtan leh oo ka hanaqaada caasimadda dalka.

“Marka tababarkan la soo gabagabeeyo, gaar ahaan Ciidda kaddib, waxaa la qaban doonaa doorashada hoggaanka degmooyinka, halkaas oo xubnaha goleyaasha deegaanka ay ku dooran doonaan guddoomiyaha degmada iyo ku-xigeennadiisa,” ayuu yiri Hosh.

Wuxuu sheegay in qorshahan uu ujeedkiisu yahay xoojinta maamulka deegaanka iyo dhismaha nidaam si wanaagsan u metela shacabka ku nool gobolka Banaadir.

Cali Xoosh ayaa sidoo kale sheegay in tababarrada xubnaha goleyaasha deegaanka ay sii socon doonaan, islamarkaana lagu bari doono maamulka degmooyinka, qorsheynta mashaariicda, adeegyada bulshada iyo habraacyada goleyaasha deegaanka.

Guddoomiyaha Guddiga Madaxa-bannaan ee Doorashooyinka iyo Xuduudaha Qaranka, Cabdi Kariin Axmed Xasan, ayaa sheegay in wajiga koowaad ee tababarradu uu diiradda saarayo sharciyada hagaya goleyaasha deegaanka iyo ururrada siyaasadeed, kuwaas oo dhawaan ay ansixiyeen Golaha Wasiirrada Soomaaliya.

Dowladda federaalka ayaa muddooyinkii dambe waday dadaallo lagu dhisayo goleyaal deegaan iyo doorashooyin ka hirgala gobolka Banaadir, iyadoo arrintaasi qayb ka tahay qorshe ballaaran oo lagu kordhinayo ka qeybgalka shacabka iyo xoojinta hannaanka dowladnimada.

Qorshahan ayaa imanaya xilli ay Soomaaliya ka taagan yihiin dooddo siyaasadeed oo ku saabsan hannaanka kala guurka siyaasadeed iyo dadaallada dowladda ee ku wajahan hirgelinta doorasho qof iyo cod ah.

Mucaaradka ayaa ku eedeeyay dowladda federaalka inay horey u waddo qorshayaasha doorashooyinka iyadoo aanu jirin is-afgarad siyaasadeed oo ballaaran, halka dowladda ay sheegtay in doorashooyinka tooska ah iyo kuwa deegaanka ay muhiim u yihiin dhismaha hay’ado si dhab ah u matala shacabka.

GAROWE ONLINE