Soomaaliya oo gudbisay dalab ku saabsan xiriirka Kenya

MUQDISHO, Soomaaliya - Soomaaliya ayaa ku baaqday in la sameeyo guddi isku dhaf ah oo ka shaqeeya qaabab dib loogu soo celinayo xiriirkii diblomaasiyadeed ee kala dhexeeyay Kenya.

"Wasaaradda arrimaha dibedda ee Soomaaliya waxay mar kale xaqiijineysaa sida ay uga go'an tahay dib u soo celinta iyo dardargelinta xiriirka diblomaasiyadda, ganacsiga iyo xiriirka dadka ee si ay u wanaagsanaato Soomaaliya iyo Kenya," ayay wasaaraddu ku tiri hadal ay ka soo saartay Muqdisho fiidnimadii Khamiista.

Wasaaradda Arrimaha Dibadda iyo Iskaashiga Caalamiga, oo soo dhaweysay dib u furitaanka Kenya ee hawadeeda, ayaa tibaaxdey in tilmaantan wanaagsan ee ay muujisay Nairobi ay tahay bar bilowga wada xaajoodyada looga gol leeyahay in si caadi looga dhigo xiriirka diblomaasiyadeed ee labada dal.

Hadalkan ayaa yimid saacado kadib markii Kenya ay ka qaaday xayiraadii saarneyd muddo bil ku dhow duulimaadyada aadaya iyo kuwa ka baxaya Soomaaliya, taas oo ka dhalatay khilaaf diblomaasiyadeed oo u dhexeeya labada dal ee deriska ah.

Kenya waxay daaha ka rogtay in dhamaadka xayiraada ay tahay tilmaam niyad wanaag ah iyadoo rajeynaysa inay u horseedi doonto xiriir caadi ah oo ay la yeeshaan Soomaaliya.

Muqdisho ayaa dhinaceeda sheegtay in dib u furista hawadu ay tahay tallaabo muhiim ah oo horay loogu qaaday hannaanka sare loogu qaadayo ganacsiga, isgaarsiinta iyo isu-socodka muwaadiniinta labada dal.

"Labada qaran ee walaalaha ah waxay waligood iska kaashadeen amniga, ganacsiga iyo xiriirka dhaqan ee wadajirka ah ee salka ku haya danaha guud, deris wanaaga iyo ixtiraamka madaxbanaanida iyo madaxbanaanida siyaasadeed," ayay tiri wasaarada.

Soomaaliya bishii Diseembar 2020 waxay u jartay xiriirkii diblomaasiyadeed ee ay la lahayd Kenya, iyadoo ku eedeysay Nairobi inay si joogto ah ugu xadgudubto madaxbannaanida Muqdisho Muqdisho waxay dib u soo celisay xiriirkii diblomaasiyadeed ee ay la lahayd Nairobi 5-tii Maajo iyadoo ay dhexdhexaadisay Qatar.

Maamulka Duulista Hawada ee Kenya ayaa joojiyay dhamaan duulimaadyadii aadi jiray iyo kuwii ka imaan jiray Soomaaliya 11-kii bishii May kadib markii Soomaaliya ay diiday in laga qaado xayiraada lagu soo rogay 2020-ka duulimaadyada xamuulka Kenya ee qaadka (miraa).

Dalabka cusub ee ka yimid Soomaaliya ayaa u muuqda mid maamulka waqtiga ka dhacay ee Farmaajo ku doonayo in uu ku hagaajiyo sawirkiisa gobolka kahor bilowga ololaha doorashooyinka.

GAROWE ONLINE