Soomaaliya oo halis ugu jirta in ay waydo codka golaha guud ee UN-ka

WASHINGTON, US – Qaramada Midoobay ayaa shaacisay in Soomaaliya ay ku jirto dalal halis ugu jira in ay waayaan codka fadhiga guud ee Jamciyadda Qurumaha Ka Dhaxeysa.

Soomaaliya ayaa ku biireysa todoba [7] dal oo kamid ah UN-ka oo wayn doona codka ay xaqa u leeyihiin, iyaddoo ay sanadkan dhaceyso doorasho muhiim ah.

Stephane Dujarric, afhayeenka Qaramada Midoobay, ayaa sababta ku sheegay in aysan bixin dhaqaalaha xubinimada oo sanadkiiba mar la bixiyo.

Dujarric oo wariyeyaasha la hadlay ayaa farta ku fiiqay in dalalkaan ay sidoo kale dib uga dhaceen bixinta lacagta kadib markii fursad la siiyey.

Dalalka kale ee la xaqiijiyey in ay arrintaan saameyn doonto ayaa waxaa kamid ah Venezuela iyo Lebanon.

Golaha guud ee UN-ka, oo ka shaqeeya siyaasadda, amniga iyo nabadda caalamka ayaa ka kooban 193 waddan.

Qodobka 19 ee xeerka Qaramada Midoobay ayaa xeerinaya in xubintii muddo laba sano ah bixin weyda dhaqaalaha aanay ka coddeyn doonin golaha.

Hase ahaatee, goluhu wuxuu u ogolaan karaa dalka in uu coddeeyo haddii uu la yimaado cudurdaar lagu qanci karo oo ku saabsan sababta beejisay doorkiisa bixinta qaaraanka.

GAROWE ONLINE