Wasiir shaaciyey cida hurineysa khilaafka hogaanka Galmudug

CADAADO, Soomaaliya - Wasiirka Warfaafinta Galmudug, Maxamuud Aadan Cismaan [Masagaway], ayaa ku eedeeyay Madaxwayne Farmaajo inuu waqti badan ku bixinayo hurinta khilaafka siyaasadeed ee u dhaxeeya hogaanka maamulkiisa.

Muranka ka dhex-jira madaxda Galmudug ayaa sababey inay ku kala shaqeeyaan Cadaado iyo Dhuusamareeb, Madaxwayne Xaaf iyo ku xigeenkiisa oo uu wehliyo Gudoomiye Cali Gacal Casar.

Wasiir Masagaway oo saxaafada la hadlay ayaa shaaca ka qaaday in Villa Soomaaliya ay soo abaabushay kulan ay Sabtidii ku yeesheen xubno ka tirsan Baarlamanka Galmudug magaalada Cadaado, kaasoo ay kaga dhawaaqeen inay xilka ka qaadeen Xaaf.

Madaxwayne Xaaf iyo Cali Gacal Casar oo Xildhibaano ku kala shiray Dhuusamareeb iyo Cadaado sheegteen inay xilkii ka xayuubiyeen ayaan si isku mid ah uga soo horjeestay.

Shaacinta Mudanayaasha ayuu tibaaxay Wasiirka Warfaafinta in ujeedada laga leeyahay ay tahay in la car-qaladeeyo dadaalo uu tilmaamay inay wadaan koox siyaasiyiin ah, kuwaasoo doonaya inay soo afjaraan colaadaha degaanka maamulkaan ka jira.

"Wixii cawaaqib xuma ah ee ka dhasha faragelinta qaawan oo ay madaxda dowladda ku hayaan maamulka Galmudug waxaa masuuliyadeeda qaadaya Madaxwayne Farmaajo," ayuu hadalkiisa kusii daray Wasiir Masagaway.

Hadalka wasiir warfaafinta Galmudug ayaa imaanaya xili saacadihii lasoo dhaafey magaalooyinka Dhuusamareeb iyo Cadaado ay kala gaareen Wafdi Xildhibaano ah oo kala raacsan dhinacyadda ku lugta siyaasadda jahwareersan ee maamulkaan.

Si kastaba, wali dowladda Federaalka wax war ah kama aysan soo saarin xiisadda siyaasadeed ee Galmudug, taasoo kusoo beegmaysa xilli Villa Soomaaliya uu khilaaf xooggan kala dhaxeeya maamul goboleedyada.

GAROWE ONLINE