"Askar ajnabi ah" oo lagu dilay weerar ka dhacay Soomaaliya
-
WARIYAHA MUQDISHO GAROWE ONLINE
- Posted On 31-03-2020, 02:50PM
GARBAHAAREY, Gedo – Warar dheeraad ah ayaa waxay kasoo baxayaan qarax saacadihii lasoo dhaafay ka dhacay magaalada Garbahaarey ee gobolka Gedo, sidda ay xaqiijiyeen mas'uuliyiinta ammaanka.
Sidda ay sheegeen goobjoogeyaal, qaraxa oo ka dhashay miino ayaa ka dhacay afaafka saldhiga ciidamadda Itoobiya.
Maamulka gobolka iyo kan degmada oo shaaca ka qaadey in uu weerarku sababay khasaaro isugu jira dhimasho iyo dhaawac ayaa ka dhawaajiyey in lagu dilay "dhowr askari oo ajnabi ah".
Dagaalameyaasha Al-Shabaab oo mas'uuliyadda falkaas dusha saartay ayaa tibaaxay in ay ku dileen laba askari oo Itoobiyaan ah, isla markaana ay ku dhaawacmeen ku dhowaad afar kale.
Xiriiro lala sameeyay taliska ciidamada shisheeye oo la tilmaamay in ay hoostagaan howlgalka AMISOM ayaanan guuleysan.
Illo wareedyo dhanka amniga ah oo u waramay Garowe Online ayaa tibaaxay in askarta la beegsaday xili ay xerada kasoo baxayeen.
Ciidamada Itoobiya ee ku sugan gudaha Soomaaliya ayaa la tilmaamay in ay isugu jiraan kuwa qeyb ka ah howlgalka Midowga Afrika iyo cutubyo kale oo aan ka tirsaneyn, kuwaasoo dowladdu adeegsato.
GAROWE ONLINE
