Xildhibaan ka tirsanaa baarlamaanka Jubaland oo la dilay

Marxuum Marxuum Isaaq Maxamed Xasan ayaa soo noqdey wasiir ku xigeenka iyo wasiiru-dowlaha amniga maamulka.

MUQDISHO, Soomaaliya - Xildhibaan ka tirsanaa baarlamaanka Jubaland ayaa koox hubeysan ay ku dishay gudaha caasimada Muqdisho, sidda ay xaqiijiyeen xubno kamid ah ehelkiisa iyo illo amni.

Marxuum Isaaq Maxamed Xasan ayaa la toogtey isagoo kasoo baxay masaajid uu ku tukaday Saladii makhrib ee xalay. Dableydii ka dambeysay falkan ayaa ka baxsatay goobta.

Xasan oo lagu waddo in lagu aaso isla magaala madaxda dowladda federaalka Soomaaliya ayaa la sheegay in uu soo noqdey wasiir ku xigeenka iyo wasiiru dowlaha amniga Jubaland.

War-saxaaafadeed kasoo baxay Madaxtooyadda Jubaland ayaa lagu sheegay in madaxwayne Axmed Maxamed Islaam uu tacsi ka diray geerida marxuumka kuna eedeeyay Al-Shabaab.

"Madaxweynaha Dowlada Jubaland Mudane Axmed Maxamed Islaam ayaa tacsi u diray ehelkii, qaraabadii, Xildhibaanada Baarlamaanka Jubaland iyo guud ahaan shacabka Jubaland geerida naxdinta leh ee ku timid Alle ha u naxariistee Xildhibaan Isaaq Maxamed Xasan oo ku geeriyooday Magaalada Muqdisho," ayaa lagu yiri qoraalka.

Bayaanka ayaa intaas waxaa la raaciyey: "Kooxo katirsan Khawaariijta ayaa Xildhibaanka dilay isagoo kasoo baxay masaajid uu ku tukaday Saladii makhrib ee [xalay]".

"Madaxweynaha ayaa Alle uga baryay inuu marxuumka ka waraabiyo janadii fardowso ehelkii iyo guud ahaan shacabka Jubaland ee uu ka baxayna rabi samir iyo iimaan ka siiyo," ayaa lagu soo xiray.

GAROWE ONLINE