Shaqaalaha Dekedda Berbera oo shaqo joojin sameeyay
-
- Posted On 12-03-2017, 01:50PM
BERBERA, Somaliland- Shaqaalaha Dekedda Berbara ee gobolka Saaxil ayaa maanta dhigay bannaanbax iyo shaqo joojin isku jira iyagoo ka cabanay caqabado ay sheegeen inay kasoo wajahday dhinaca nolosha.
Qaar kamid ah dadka gadooday oo lahadlay warbaahinta gudaha, ayaa xusay in shirkadda DPWorld oo 1-dii Bisha Saddexaad, la wareegtay maamulka dekeddaas ay cadaadis saartay shaqaalaha.
Waxay sheegeen in lagu amray inay ku shaqeeyaan mushahar yar, hadii kale la keeni doono ajaanib ku shaqaysa awaamiirta iyo rabitaanka shirkadda.
Balse, Guddoomiyaha gobolka Saaxil, ayaa xusay in xaaladda iminka la dajiyay islamarkaana wixii jira lagu dhammayn doono wada-hadal.
Ilaa hadda arrintan kama hadlin tallaabadan shirkadda DPWorld.
Tallaabadan ayaa timid xilli shirkaddan casriyayn ku samaysay Dekedda kadib hishiis ay la gashay xukuumadda Somaliland inkastoo dadka gobolkaas kasoo horjeedeen.
GAROWEONLINE
