Siilaanyo oo u hambalyeeyey dhiggiisa Jabuuti
-
- Posted On 10-04-2016, 03:38PM
HARGAYSA- Madaxweynaha Somaliland, Axmed Maxamed Siilaanyo, ayaa ka hadlay doorashada madaxtinimo ee dalka Djibouti iyo guusha uu madaxweyne Cumar Geelle kasoo soo hooyey, isagoo si weyn u hambalyeeyey go’aanka shacabka reer Djibouti mar afraad ku doorteen Madaxweyne Geelle.
War qoraal ah oo kasoo baxay aqalka madaxtooyada, ayaa lagu sheegay inuu Madaxweyne Siilaanyo bogaadiyey aadna ugu farxay doorashada sida nabadda ah uga dhacday dalka Djibouti, islamarkaana dhambaal hambalyo ah u diray dhiggiisa Djibouti.
Qoraalka kasoo baxay madaxtooyada Somaliland, waxaa sidoo kale lagu sheegay in xidhiidhka Somaliland iyo Djibouti oo noqon doono mid ka xoog badan sida uu haatan yahay.
Ugu dambayntii madaxweyne Siilaanyo waxa uu shacabka rDjibouti u rajeeyey guul iyo barwaaqo mustaqbalka dhaw ah, isagoo kula dardaarmay inay ilaashadaan nabadooda.
Guddiga Doorashada dalka Djibouti ayaa shaaciyey in Madaxweyne Ismaaciil Cumar Geelle markii afraad loo doortay madaxtinimada dalkaas, isagoo tiro ka badan 86% (boqolkiiba lix iyo sideetan) kaga guulaystay murashaxiintii kale ee ay doorashada ku loolameen.
GAROWEONLINE
