​Somaliland: Mas'uul ka iska casilay xisbiga Wadani

HARGAYSA- Xog-hayihii warfaafinta ee xisbiga waddani Boobe Yuusuf Ducaale, ayaa shaaciyey inuu  gebi ahaanba iska casilay xubinimadii iyo xilkii uu xisbiga mucaaradka Waddani ka hayey.

Boobe oo saxaafadda la hadlay, ayaa si sarbeeban u cabiray sababta uu xisbigaas iskaga casilay, wuxuuna sheegay inuu saluug dartii go’aankaas u qaatay.

“Isma aan lahayn xisbiga Waddani waxad ugu tegaysaa xarun maran, xafiisyo maran, iyo xilal maran, sidii aan isu lahayn saluug badan baad xukuumadda ugu tegaysaa markii aan wasiirka noqonayey, taasina waa ta saluugga keentay, waayo aragnimada taban ee aan xukuumad iyo xisbiga kala kulmay waxa ugu mudan sida ay hawlgalladoodu u yihiin qosol-ku-jabka iyo hugunka” Ayuu yiri Boobe Yuusuf Ducaale.

Boobe Yuusuf Ducaale ayaa xukuumadda madaxweyne Siilaanyo hore uga soo noqday wasiirka warfaafinta, waxana muddo kooban kadib xilkaas looga qaaday khilaaf dartii, isagoo  intaas  kadibna ku biiray xisbiga mucaaridka Waddani.

GAROWEONLINE