Somaliland: Muran ka taagan deked mac-mal ah
-
- Posted On 13-02-2016, 03:19PM
BERBERA- Khilaaf gaadhay in gacanta la iskula tago, ayaa ka taagan deegaanka Ceel-garde oo qiyaastii 35KM dhinaca Bari kaga beegan magaalada Berbera, halkaas oo laga hirgelinayey deked macmal ah.
Wararka ayaa sheegaya in saaka aroortii hore dablay hubaysan weerar qorshaysan ku qaadeen goobta dekedda laga hirgelinayey, iyagoo khasaare maaliyadeed gaadhsiiyey qalab cagafyo u badnaa oo qodista dekeddaas ku hawllanaa.
Dablayda weerarkaas qaadday oo aan wali la aqoonsan, balse waxaa loo badinayaa inay kasoo jeedaan midka mid ah beelaha gobolka Saaxil, kuwaas oo kasoo horjeeda dhismaha dekedda deegaanka Ceel-garde. Weerarka kadib dablayda falkaasi gaysatay ayaa goobta iskaga baxday.
Wararku waxa ay intaas ku darayaan in ciidamo ammaanka suga halkaas loo diray, iyadoo gudoomiyaha gobolkaas Jaamac Yuusuf oo warbaahinta la hadlay meesha ka saaray inuu iska hor imaadkaasi dhaliyey wax khasaare ah.
Dekedda lagu muransan yahay ee la doonayo in laga hirgeliyo Ceel-garde ayaa waxaa kasoo jeeda badi dadka degan gobolka Saaxil iyadoo aan la ogayn sababta keentay.
GAROWEONLINE
