Maamulada oo shaaciyey mowqifkooda xaaladda dalka

Hogaamiyeyaasha shanta dowlad goboleed ee waddanka ayaa soo saarey bayaan kadib kulan deg-deg ah oo ay yeesheen.

MUQDISHO, Soomaaliya - Hoggaamiyayaasha Maamulada Soomaalida oo kulan deg-deg ah ku yeeshay Zoom-ka ayaa soo saaray bayaan ay kaga hadlayaan xiisadda siyaasadeed ee dalka.

Warsaxaafadeedka ayaa diiradda lagu saaray baahida loo qabo in madaxda federaalka ay xalliyaan khilaafaadkooda, lana dedejiyo qabsoomidda doorashooyin Dalka ee Dibka u dhacay.

Bayaanka oo ka kooban laba bog uuna nuqul kamid ah arkay warsidaha Garowe Online ayaa u muuqda mid dhexdhexaad ah oo aan eedda khilaafka midna dusha uga tuureyn.

Ilo xog ogaal ah ayaa u sheegay mareegga GO in madaxweyne Qoorqoor-ka hogaamiya Galmudug uu diiday in qoraalkaasi si cad loogu eedeeyo madaxweynaha xilkiisu dhamaadey.

Madaxda Maamulada Soomaaliya ayaa sida ku xusan war-saxaafadeedka ay soo saareen, waxay sidoo kale isku raacay in caasimada Garoowe lagu shiriyo 21-23 September.

Kulanka soo socda ayaa looga hadli doonaa qabsoomidda doorashooyinka iyada oo aan casuumaad lagu darin RW Rooble oo ahaa mas’uulkii qabanqaabiyay doorashooyinka dalka.

Is-aragan wuxuu kusoo beegmayaa iyadda oo waddanka galay xaalad siyaasadeed kaasoo salka ku haya kiiska Ikraan Tahliil Faarax oo lala xiriirinayo hogaanka hay'adda sirdoonka qaranka.

GAROWE ONLINE