Golaha degaanka Nugaal oo la kala direy, agaasimayaal la badaley
-
- Posted On 03-06-2015, 11:19AM
June 3, 2015 (GO)- Madaxweynaha Puntland Cabdiweli Maxamed Cali Gaas ayaa xilka ka qaadey duqii degmada Garowe Cabdicasiis Cilmi Koor, islamarkaana kala direy golihii deegaanka ee Garowe.
Duqa cusub ee Garowe waxaa loo soo magacaabay Axmed Siciid Geelle halka ku-xigeenka cusubna loo soo magacaabay Mustafe Siciid Faarax.
Dhanka kale, Madaxweyne Gaas ayaa isku beddeley afar agaasime guud.
Agaasimihii Wasaaradda Arrimaha Gudaha waxaa loo wareejiyey Wasaaradda Cadaaladda halka kii cadaaladdana loo beddeley wasaradda Haweenka.
Agaasimihii Wasaaradda Haweenkana waxaa loo wareejiyey Arrimaha Gudaha.
Xil ka qaadista maayerka Garowe iyo kala dirista golaha deegaanka ayaa kusoo aadaysa todobaad kadib markii Cabdiweli Gaas sidan oo kale xilka uga qaadey mas'uuliyiintii ugu sarreysey maamulka gobka Bari iyo degmada Bosaso islamarkaana kala direy golihii deegaanka ee Bosaso.
GAROWEONLINE
