July 29, 2015 (GO)- Madaxweynihii hore ee Puntland Cabdiraxmaan Sheekh Maxamed Maxamuud (Farole) ayaa maanta si weyn loogu soo dhaweeyey magaalo madaxda Puntland ee Garoowe.

Soo dhaweynta Dr. Farole waxaa ka qayb qaatay mas'uuliyiin ka tirsan dowladda oo isugu jirey wasiirro, xildhibaanno, saraakiil ciidan, isimmo iyo kumannaan dadweyne ah.

Mudane Cabdiraxmaan wuxuu si kooban dadweynaha ugula hadlay barxadda Garowe, isagoo uga mahadceliyey sida diirran ee ay usoo dhoweeyeen.

"uma imaan inaan cid culeys saaro, uma imaan arrin siyaasadeed...shiddo ma wado cidna shar kulama socdo...waxan u imi booqasho faamilkeyga ah" ayuu yiri.

Mar wax laga weydiiyey qorshihiisa ku aaddan doorashooyinka Somalia ee 2016, wuxuu ka gaabsaday inuu ka hadlo, isagoo hadalkiisa kusoo koobay in arrintaas ka hadalkeedu ku haboon yahay marka la gaaro 2016.

Booqashadani waa tii ugu horreysey ee Dr. Farole ku yimaado Puntland laga soo bilaabo markii uu xilka wareejiyey.

GAROWE ONLINE