Farmaajo oo qaabiley Safiirka cusub ee Qadar [DAAWO]

Soomaliya
By Wariyaha Muqdisho , Garowe Online

MUQDISHO, Soomaaliya - Madaxweynaha Soomaaliya, Maxamed Cabdullaahi Farmaajo ayaa maanta oo sabti ah ka gudoomay warqadaha aqoonsiga safiirka cusub ee dowladda Qadar Hassan Hamza Asad Hashem.

Danjiraha ayaa dhanka kale u gudbiyay Farmaajo salaan uu uga wadey Amiirka Qadar Sheikh Hamad bin Khalifa al-Thani.

Madaxweyne Farmaajo oo munaasabadda soo dhaweynta Safiirka cusub ka hadlay ayaa uga mahadceliyay Amiirka Qadar iyo dowladdiisa sida ay uga go'an tahay xoojinta xiriirka Soomaaliya.

Hassan Hamza Asad Hashem ayaa ah Safiir aan caadi ahayn oo awood badan leh [Extraordinary Ambassador], kaasi oo heshiisyo u gali kara dowladiisa, waxaana lasoo magacaabay bishii Maarso ee sanadkan.

Waa Danjirihii ugu horeeyay oo Qadar usoo dirto Soomaaliya wixii ka dambeeyay markii uu billowday Khilaafka kala dhaxeeya dowladaha Carabta ee ay hormuudka u yihiin Sacuudiga iyo Imaaraadka.

Safaaradda Qadar ee Muqdisho waxaa horey u joogay diblomaasi arrimo-fuliye ah, oo aan Safiir ahayn.

Arintan ayaa kusoo beegmaysa xilli xiriirka Imaaraadka iyo dowladda Federaalka Soomaaliya uu gaarey meel hoose, iyadoo dowladda Qadar oo dagaal kala dhaxeeya UAE ay xoojisay xiriirkeeda maamulka Farmaajo.

HOOS KA DAAWO MUUQAALKA:

GAROWE ONLINE