Madaxa UNSOM oo Kenya kala hadlay arrimaha Soomaaliya

NAIROBI, Kenya - Ergayga cusub ee dhawaan Qaramada Midoobey usoo magacawday Soomaaliya, Nicholas Haysom ayaa kulan gaar ah kula yeeshay magaalada Nairobi wasiirka arrimaha dibadda Kenya, Monica Juma.

Haysom, ahna madaxa howlgalka Kaalmeynta Qaramada Midoobey ee Soomaaliya [UNSOM] iyo Monica Juma ayaa kawada hadlay khilaafka dowladda Soomaaliya iyo maamul goboleedyada iyo amniga dalka.

Arrimaha sidoo kale diiradda ku saareen kulanka ayaa waxaa kamid ah howlgalka ciidamada Midowga Africa ee Soomaaliya [AMISOM], kaasi oo ay isla qireen inuu laf-dhabar u yahay dagaalka Al-Shabaab.

Labada Mas'uul ayaa ugu baaqay Gollaha Amaanka ee Qaramada Midoobey inay kordhiyaan taageeradda AMISOM, madaama la doonayo in Soomaaliya ka xorreeyaan Al Shabaab kahor 2020.

Kenya ayaa ciidamo ka jooga Soomaaliya, kuwaasoo qeyb ka ah AMISOM tan iyo 2012, iyagoo ka howlgala Gedo iyo Jubbooyinka, oo kamid ah meelaha ay ku xoog badan yihiin xoogaga Al-Shabaab.

Ciidamada AMISOM oo dalka soo galay 2007 ayaa ilaaliya xaruumaha muhiimka ah ee dowladda, sida Madaxtooyadda, Gollaha Shacabka, Garoonka diyaaradaha Aadan Cadde iyo Dekedda Muqdisho.

GAROWE ONLINE