AFRICOM: Sarkaal Al-Shabaab ah oo xiriir la lahaa Al-Qaacida ayaan dilnay
WASHINGTON, US – Milatariga Mareykanka ayaa wuxuu shaaciyey in duqeyn uu koonfurta Soomaaliya ka fuliyey 19-kii November, Talaado, 2019, uu ku dilay sarkaal Al-Shabaab ah.
Weerarka dhanka cirka oo ka dhacay degaanka Kuunya Barow ee gobolka Shabeellaha Hoose ayaa lagu khaarijiyey sarkaalkaas oo xiriir toos ah la lahaa shabaakadda Al-Qaacidda.
Taliska Mareykanka ee Afrika oo war-saxaafadeed soo saarey soona bandhigin aqoonsiga horjoogaha ayaa meesha ka saarey in ay jirto waxyeelo soo gaarey rayid.
William Gayler, agaasimaha howlgaladda taliska AFRICOM, ayaa rumeysan in duqeymaha cirka "ay u diidayaan argagixisadda dhaqdhaqaaq xor ah oo ay dadweynaha ku dhibaayeen".
Dowladda Federaalka Soomaaliya oo duqeynta ka hadashay ayaa xustay in sarkaalka la dilay uu muhiim u ahaa xoogaga magaaladda caasimadda ah ee Muqdisho laga saarey 2007-dii.
Hase ahaatee, Al-Shabaab oo falcelisay ayaa shaqsiga la naf-gooyey ku qeexday "ganacsade caan ka ahaa gobolka Shabeellaha Hoose" oo hoostaga maamul goboleedka Koonfur Galbeed.
Mareykanka ayaa horey ugu lug-yeeshay weerar dhanka cirka ah oo ay khasaaro kasoo gaareen shacab, wallow illaa iyo haatan aanu jirin wax magdhow ah oo la siiyey dhibaneyaasha.
GAROWE ONLINE