​Qaraxyo ka dhacay Baardheere Gedo

Image

Ugu yaraan shan miino ayaa lagu aasay degmada Baardheere gobolka Gedo, waxaana lala eegtay kolonyo katirsan ciidanka dowladda iyo kuwa Ethopia ee qaybta ka ah Midowga Afrika xilli ay marayeen magalada.

Inta la hubo labo ruux ayaa ku dhintay  weeraradaasi, waxaana jira dhaawacyo kala duwan oo ka dhashay miinooyinka dhulka lagu aasay.

Mid kamid ah qaraxyada dhulka lagu aasay ayaa haleeshay gaari ay wateen ciidamada Ethopia, waxaana falkaasi kadib Milaterigu fureen rasaas dhaawacday saddex ruux oo shacab ah.

Arrintan ayaa keentay inuu hakad galo isu socodka gaadiid iyo dadweynaha, waxaana la jaray isgaarsiinta degmada intii howlgalka lagu jiray.

Goob joog Garowe Online, la xiriiray waxuu sheegay in miinada xalay degmada lagu aasay isagoo carrabka ku dhuftay in looga shakisanyahay ururka Shabaab, balse iyagu si cad uma sheegan.

Salaad Maxamud Xasan oo ah taliyaha Boliiska Baardheere oo la hadlay BBC, ayaa sheegay in ugu yaraan 12 qarax lagu aasay magalada bartamaheeda, wuxuuna intaasi raaciyay inay soo qabteen ku dhawaad 20 ruux oo falkaasi looga shakisanyahay.

Dadka dhintay, ayuu tilmaamay inuu ku jiray cunug yar oo dugsi quraan dhiganayay, isagoo cadeeyay in labo kamid ah miinooyinkaasi ciidamadu soo saareen kahor intaysan qarxin.

Salaad ayaa xaqiijiyey dhaawaca askari katirsan ciidamada Ethopia.

Falkan, ayaa kusoo beegmaya xilli qaybo badan oo gobolka kamid ah kusuganyihiin mallayshiyaad katirsan ururka Shabaab.

Xaaladda Baardheere ayaa hadda dagan, waxaana gacanta ku haya ciidamada huwanta ah ee horay u joogay.

GAROWEONLINE

Related Articles

Baarlamaanka Soomaaliya oo doodii ugu dambeysay ka yeeshay Dastuurka

Ajanadaha kulanka maanta ayaa ahaa dib-u-eegista dastuurka marxalada 3-aad.

  • Soomaliya

    28-03-2024

  • 11:23AM

Ururo ka dhisan Marooko oo ku baaqay in la sii daayo muwaadiniin ay Puntland dil ku xukuntay

6-qof oo u dhashay dalka Marooko ayaa laga soo qabtay deegaanada ay ku sugan yihiin Daacish.

  • Soomaliya

    28-03-2024

  • 07:28AM