Sarkaal Muqdisho lagu diley
-
- Posted On 13-09-2014, 10:54AM
Sabti, Sept 13, 2014 (Garowe Online)- Weerar ka dhacay degmada Wadajir ee magaalada Muqdisho waxaa lagu dilay sarkaal ka tirsanaa Dowlada Federaalka gaar ahaan ciidanka sirdoonka qaybtiisa la dagaalanka argagixisada.
Sarkaalkaas oo lagu magacaabi jirey Maxamed Qeybe waxaa gaarigiisa tacshiirad huwiyey dabley hubeysan oo gaari kale watey, kuwaas oo durbadiiba goobta ka baxsaday.
Weerarka waxaa sidoo kale lagu diley dhowr askari oo sarkaalkaas ilaalo u ahaa kana tirsanaa hay’adda nabad sugida Soomaaliya. Mas'uuliyadda weerarkaas waxaa sheegtay Ururka Al-shabaab.
Saraakiisha ammaanka ee Dowladda Soomaaliya weli kama hadlin weerarka lagu diley Maxamed Qaybe.
Al-Shabaab ayaa horay ugu hanjabay inay weerarro xoog leh oo aar-goosi ah qaadi doonaan, kadib markii la dilay hogaamiyahoodii Axmed Cabdi Godane.
GAROWE ONLINE.
