Xasan Sheekh oo ka digay muddo kororsi loo sameeyo madaxda DF

MUQDISHO, Soomaaliya – Xasan Sheekh Maxamuud, madaxweynihii 8aad ee Soomaaliya, ayaa ka digay muddo kororsi loo sameeyo baarlamaanka haatan shaqeeya ee dalka iyo madaxda dowladda federaalka ah.

Hogaamiyaha xisbiga Midowga Nabadda iyo Horumarka ayaa sheegay in taariikhda dalka ee dhanka doorashooyinka ay meesha ka saareyso muddo kororsi ama dib u dhac, duruufo kasta oo yimaadda.

Maxamuud oo Khamiista maanta ah qoraal soo dhigay bartiisa gaarka ah ee Facebook-ga ayaa ku baaqay in coddeynta ay ku qabsoonto waqtigeeda.

"Waxaan lee yahay doorashadu waa ASTAAN dowladnimo oo leh xeer iyo dhaqan dimoqraadi ah," ayuu qayb kamid ah faaladiisa ku yiri.

Xasan Sheekh Maxamuud, oo ku jira hogaanka Madasha Xisbiyadda Qaran ayaa raaciyey: "Madaxda hay’adaha dastuuriga ah iyo golayaashaba waxaa looga fadhiyaa oo laga wada sugayaa doorasho ku dhacda waqtigeedii".

Hoos ka akhriso qoraalka

Iyadoo baryahaan Golaha Shacaba ee baarlammaanka ka doodayo xeerka doorashada JFS, in siyaasiyiinta qaarkood iyo dad sheegta iney qubaro yihin ay ku doodayaan ifinta Waddo suurtagalineyso in la sammeeyo KORORSIIMMO xilliga hay’adaha dastuuriga qaarkood iyadoo lagu sababeynayo haddii ay dhacaan duruufo aan doorasho laga qaban karin.

Lix bilood ayaa doorashada dib loo dhigayaa haddii ay dhacaan duruufahaas - kuwaas oo aan la garaneyn waxa ay yihiin.

Haddii lix bilood looga bixi waayana, baarlammaanku waa joogayaa ee madaxda ayaa la dooranayaa. Baarlammanku wuxuu joogayaa markaas ilaa xilli aan la garaneyn isna.

Waxaan rabaa dadka Soomaaliyeed inaan la wadaago taariikhda doorashooyinka ee dalkeenna.

1964tii dalka Soomaaliya waxaa laga qabtay doorasho iyadoo dalku ku jiro dagaal. Xilligaas waxaa soo baxay halhayskii caanka noqday ee ahaa “GACANNE WAXBAAN KU DOORANEYNAA GACANTA KALENA DALKAAN KU DAAFACEYNAA”.

Doorasho lagu guuleystay ayaa dhacday iyadoo dagaalkii uu Socodo.

2011-2012 iyadoo lagu jiro qabanqaabadii doorashada waxaa dalka ka dhacay abaaro ba’an. Abaarahaas waxaa nooga dhintay, AUN 250 kun oo Soomaali, Shabaabne waddooyinka magaalada Xamar qaar ayey dhufeysyo ka qoteen oo dagaal looga saaray, doorashadiina waa dhacday.

2016 Dagaalka shabaab waa jiray oo waa tii ay weerareen Madaxtooyo, Maxkamadda, Baarlammaanka iyo xarumaha AMISOM iyo UNka intaba. Haddane sidaas oo ay tahay nagama hor istaagin doorasho.

Haddaba, haddii aan leennahay taariikh doorasheedkaas iyo waayo aragnimadaas, waa maxay duruufaha iyo masiibooyinka intaas aan soo sheegnay ka weyn ee aan la garaneyn ee siyaasiyiinta qaar ay arkaan.

Kororsiimo hay’adaha dastuuriga ah waxay ka hor immaaneysaa dastuurka JFS ee aan ku dhaqaanno. Sidoo kale kororsiimadu waxay ka hor immaaneysaa xaqa dastuuriga ah ee ah muwaaddinku in la doorto iyo inuu wax doorto.

Waxaan ku soo gabagabeynayaa madaxda hay’adaha dastuuriga ha ilaaliyeen dhaqanka dimiqraadiga ah ee curdanka ah ee dalkeenna. Sidoo kale xildhibaannada baarlammaanka federaalka ee jamhuuriyadda ha dhowreen dhaartii ay dhaarteen iyo wixi ay u dhaarteen ee ummaddu ku aamintay.

Waxaan leeyahay doorashadu waa ASTAAN dowladnimo oo leh xeer iyo dhaqan dimoqraadi ah.

Madaxda hay’adaha dastuuriga ah iyo golayaashaba waxaa looga fadhiyaa oo laga wada sugayaa doorasho ku dhacda waqtigeedii.

INAAN JOOGO JECLAAYAA DALKAAN DANI UGUMA JIRTO.

Doorashadda la filayo in ay sanadka dambe ka qabsoonto dalka ayaa la rajeynayaa in ay noqoto qof iyo cod, waxaana digniinta Xasan ay kusoo aadeysaa xili Golaha Shacabka ku guda jiro ka doodista sharciga doorashooyinka.

GAROWE ONLINE