Xildhibaan caan ahaa oo Muqdisho ku geeriyooday

Soomaliya
By Wariyaha Muqdisho , Garowe Online
Xildhibaan Khaliif Sheekh Cabdullaahi [Duurey] oo Muqdisho ku geeriyooday

MUQDISHO, Soomaaliya - Waxaa caawa Muqdisho ku geeriyoodey mid kamid ah Gollaha Shacabka ee Baarlamaanka 10aad ee hadda shaqeynaya, kaasi oo lagu magacaabi jiray Xildhibaan Khaliif Sheekh Cabdullaahi [Duurey].

Xildhibaanka oo Sadexdii maalin ee la soo dhaafay xanuunsanaa ayaa galabta la geeyay Isbitaalka Madiina, halkaasi oo uu ku dhintay intii lagu hayey daweynta abaare 09:30Pm ee Habeenimo.

Allah ha u naxariistee marxuum Khaliif Sheekh Cabdullaahi ayaa ahaa Xildhibaan laga soo doortey maamulka Koonfur Galbeed, mana la shaacin wali nooca xanuunka uu u geeriyooday.

Ra'iisul Wasaare Xasan Cali Khayre iyo madax kale oo katirsan labada golle ee dowladda ayaa ka tacsiyadeeyay geerida Xildhibaanka, waxayna ALLAH uga baryeen inuu geliyo jannadiisa firdowsa.

Waxaa lagu wadaa in Meydka Xildhibaanka aas qaran loo sameeyay maalinta berri ah, waxaana geeridiisa kusoo aadaysaa xilli la filayo in Gollaha Shacabka ay Isniinta doortaan Gudoomiye cusub.

GAROWE ONLINE

Wararkii ugu dambeeyey