Al-Shabaab oo weerar dhimasho horseeday ka fulisay Kenya

Lix qof oo rayid ah ayaa lagu waramay in ay ku nafwaayeen dhacdadan.

NAIROBI, Kenya - Dagaalameyaal loo maleynayo Al-Shabaab ayaa aroornimadii saaka weerar gaadmo ah ka fuliyey qaybo kamid ah Kenya, sida ay kuwa warantay warbaahinta maxaliga ah.

Irungu Macharia, taliyaha booliska gobolka xeebta dhaca ee Lamu, ayaa xaqiijiyey in weerarka uu ka dhacay aagga Majembeni isla markaana dableyda ay gubeen dhowr guri rayid ah.

Macharia ayaa intaas ku daray in lix qof ay ku dhinteen dhacdadaas. Mid kamid ayuu xusay in faas lagu dilay. Afarta kale ayuu shaaca ka dhigay in ay ku gubteen guriyihii ay ku jireen.

"Baaritaano ayaan ku bilownay meesha ay kasoo bilowdeen dhacdooyinkan foosha xun. Waxaana dadweynaha ku boorinaynaa in ay nala shaqeeyaan," auu hoosta ka xariiqay Macharia.

Inta la og-yahay, falkan ayaa wuxuu noqonayaa weerarkii ugu horeeyay ee tan iyo markii uu bilowdey sanadkan cusub 2022-ka ay dagaalameyaasha hubeysan ka geystaan waddanka Kenya.

Xoogaga gacansaarka la leh shabakada argagixisada ah ee Al-Qaacida ayaa joogitaan culus waxay ku leedahay Kenya gaar ahaan goboladda xuduudka la leh Soomaaliya oo saldhigoodu yahay.

Kenya ayaa kamid ah dowladaha ciidamadda ku tabarucay howlgalka hoostaga Midowga Afrika ee AMISOM kaasoo muddo xileedkiisa uu dhamaadey balse cusbooneysiin aan caddeyn loo sameeyay.

GAROWE ONLINE