Getachew Reda: Gobolka Tigray oo yeeshay hogaamiye ku meelgaar ah

Ma cadda goorta ay dowladda federaalka go'aan kama dambeys ah ka qaadaneyso magacaabista Getachew.

ADDIS ABABA, Ethiopia - Xisbiga talada haya ee gobolka Tigray ee dalka Itoobiya ayaa afhayeenkooda Getachew Reda u magacaabay inuu noqdo madaxweynaha maamul ku meel gaar ah, sida ay sheegtay warbaahinta uu xisbigu maamulo.

Haddii magacaabista Getachew ay ogolaato dowladda federaalka Itoobiya waxa uu bedeli doonaa hogaamiyaha TPLF, Debretsion Gebremichael, kaasoo tan iyo 2018 hogaaminayay Tigrayga.

Ma cadda goorta ay dowladda federaalka go'aan kama dambeys ah ka qaadaneyso magacaabista Getachew iyo xilliga la dhisayo maamulka ku meelgaarka ah.

Afhayeenka dawladda Itoobiya, Legesse Tulu, ayaa si degdeg ah uga soo jawaabin codsi ay u dirtey warbaahinta caalamiga ah gaar ahaan wakaaladaha wararka sidda Reuters.

Maamul la'aanta Tigray ayaa caqabad ku noqotay wax ka qabashada xaaladaha bini'aadantinimo ee guud ahaan Tigrayga, halkaas oo malaayiin ay u baahan yihiin gargaar, sida ay sheegeen shaqaalaha gargaarka.

"Mushaaraadka shaqaalaha rayidka ah iyo shaqaalaha caafimaadka ayaan la siinin, hay’adaha gargaarkana waxa ay la’yihiin cid si cad ula shaqeysa," ayay hoosta ka xariiqeen.

Magacaabida Getachew ayaa timid maalmo ka dib markii xoghayaha arrimaha dibadda ee Mareykanka Antony Blinken uu booqasho ku tagay Itoobiya, kuna baaqay hirgelinta heshiiska nabadda kana digay cawaaqib ka dhasha haddii lagu fashilmo.

GAROWE ONLINE