"Qaniinyo diblumaasiyadeed" oo dhexmartey Jarmalka iyo Chad
-
WARIYAHA AFRIKA GAROWE ONLINE
- Posted On 12-04-2023, 05:55AM
NAIROBI, Kenya - Safiirka Chad u fadhiyay Jarmalka ayaa dalkaas looga eryay tallaabo aargudasho ah oo ay qaaday Berlin ka dib markii dalka Afrikada dhexe uu boor-sooyinkiisa usoo xir-xiray danjirihii waddanka ku yaalla Yurub.
Wasaaradda arrimaha dibadda ee Jarmalka ayaa war-saxaafadeed ay soo saartey Talaadadii ku sheegtay in Mariam Ali Moussa ay dalkaas uga baxdo muddo 48-saac gudaheeda ah.
"Waan ka xunahay in ay timaaddo arrintan," ayaa lagu yiri bayaan kooban oo lagu daabacay ciwaanka barta Twitter-ka ee wasaaradda arrimaha dibadda ee Jarmalka.
Danjirihii Jarmalka u fadhiyay Chad, Jan-Christian Gordon Kricke, ayaa Sabtidii lasoo dhaafay dhaaftay waxa uu kasoo dhoofay dalkaas ka dib markii ay dawladda milateriga ahi eriday.
Chad ayaa ku amartay Mr Kricke inuu dalka ka baxo sababo ku aadan wax ay ku tilmaamtey "dabeecad xumadiisa" iyo "ixtiraam la'aanta caadooyinka dublamaasiyadeed".
War kooban oo kasoo baxay dowladda Chad ayaan faah faahin dheeraad ah laga bixin sababta loo beegsaday. Balse, safiirka wuxuu aad u dhaleeceeyay dowladda militariga uu hoggaamiyo ee xukunka heysay tan iyo Abriil 2021.
Mas’uuliyiinta Jarmalka oo aad uga caroodey talaabadda ayaa waxay carabka ku adkeeyeen in Chad aysan si rasmi ah u caddeyn sababaha rasmiga ah ee loo eryay safiirka.
"Ambassador Kricke wuxuu waajibaadkiisa u gutay si ku dayasho mudan, wuxuuna ka shaqeeyay xuquuqda aadanaha iyo in si degdegga ah xukunka loogu wareejiyo dowlad rayid ah," ayay tiri wasaaradda Jarmalka.
Gen Mahamat Idriss Déby Itno, oo xukunka la wareegay kadib geeridii aabihiis Idriss Déby Itno 2021, waa hogaamiyaha ku meel gaarka ah ee Chad waxa loogu talagalay in uu noqdo 18 bilood.
Doorasho la qorsheeyay 2022-dii ayaa dib u dhac ku yimid bishii Oktoobar, taasoo keentay mudaaharaad dadweyne. Dowladda militariga ee Chad waxay hadda qorsheyneysaa inay qabato doorashada madaxtinimo ee sanadka soo socda.
GAROWE ONLINE
