“Aad ayaan uga niyad jabay,” ayuu yiri Trump kadib wada hadal telefoon oo uu la yeeshay Putin

MADAXWEYNAHA Mareykanka Donald Trump ayaa sheegay inuu “aad uga niyad jabay” Madaxweynaha Ruushka Vladimir Putin kadib wada hadal telefoon oo dhacay 3-da July, kaasoo labada hoggaamiye kaga hadlayay dagaalka socda ee Ukraine.

Trump ayaa wariyeyaasha u sheegay inuusan “horumar ka gaarin wadahadalka” wuxuuna ku eedeeyay Putin inuusan muujin doonin dagaalka.

Sidoo kale Trump wuxuu sheegay inuu qorsheynayo inuu la hadlo Madaxweynaha Ukraine Volodymyr Zelensky maalinta 4-ta July.

“Berri subaxda hore ayaan la hadlayaa Madaxweynaha Zelensky, waxaana aad uga niyad jabay wadahadalka aan maanta la yeeshay Madaxweynaha Putin,” ayuu Trump u sheegay wariyeyaasha. “Sababta oo ah ma u maleynayo inuu diyaar yahay. Aad ayaan uga niyad jabay. Ma u maleynayo inuu doonayo inuu joojiyo dagaalkan.”

Goordhow 4-ta July, afhayeenka Kremlin Dmitry Peskov ayaa sheegay in Ruushku “si dhow ula socdo dhammaan hadallada Trump,” laakiin ku daray in Moscow ay sii wadi doonto dagaalka baaxadda leh ee Ukraine sababtoo ah “ma suurtogal ahayn in hada la gaaro yoolalka wadooyin diblomaasi ah.”

Wadahadalka saacad socday ee Trump iyo Putin ayaa ahaa kan lixaad ee ay ka wada hadlaan tan iyo markii Trump xilka la wareegay bishii Janaayo. Sida uu sheegay kaaliyaha Kremlin Yury Ushakov, Putin wuxuu ku celiyay in “Ruushku sii wadi doono yoolalkiisa,” isagoo diiday inuu ka laabto sababaha aasaasiga ah ee khilaafka, sida ay Kremlin u aragto.

Caddaynta rasmiga ah ee wicitaanka ma soo saarin Aqalka Cad. Trump wuxuu sheegay faahfaahin yar, kaliya isagoo sheegay in wadahadalku ka koobnaa “waxyaalo badan” iyo xaqiijin in horumar la’aan lagu gaaray xagga joojinta dagaalka.

Wicitaankan ayaa dhacay saacado ka hor duqeyntii cirka ee ugu weynayd ee Ruushku ka fuliyay Ukraine bilihii ugu dambeeyay. Sida uu sheegay Zelensky, qeylo-dhaanta duqeynta cirka ayaa ku bilowday Ukraine ku dhawaad isku mar wararka ka soo baxay wicitaanka Trump iyo Putin.

“Ruushku mar kale wuu caddeeyay inuusan joojin doonin dagaalka iyo argagixisada,” ayuu yiri Zelensky. “Duqeyntii ugu horreysay ee magaalooyinkeena iyo gobolladeena waxay billowday shalay, ku dhawaad isku mar markii warbaahinta laga bilaabay wadahadallada telefoonka Trump iyo Putin.”

Habeenkii 4-ta July, ciidamada Ruushka ayaa weerar cirka ah ku soo qaaday Ukraine iyadoo la adeegsanayo in ka badan 550 hub oo diyaaradeed, oo ay ku jiraan in ka badan 330 diyaarado drone ah oo nooca Shahed ah oo laga keenay Iiraan iyo noocyo badan oo gantaalo ah, iyadoo caasimadda Kyiv ay ahayd bartilmaameedka ugu weyn.

Ugu yaraan 23 qof ayaa ku dhaawacmay caasimadda, halkaasoo dab qabsaday degmooyin badan, iyo wasakheynta hawada oo gaartay heerar khatar ah.

Zelensky ayaa mar kale ku baaqay in la kordhiyo taageerada milatari ee ay siiyaan la-hawlgalayaasha Ukraine, gaar ahaan keenista nidaamka gantaalada Patriot ee Mareykanka.

Inkastoo Ukraine ay si degdeg ah ugu baaqday, Waaxda Difaaca Mareykanka ayaa hakisay dhoofinta nidaamyada Patriot iyo hubka muhiimka ah ee kale, iyagoo sabab uga dhigay baahida loo qabo in la buuxiyo kaydka gudaha.

Masuuliyiinta Ukraine ayaa digniin u soo jeediyay in hakadka noocan oo kale ah uu dhiirrigelin karo Ruushka islamarkaana kordhin karo weerarrada lagu qaado shacabka.

GAROWE ONLINE