Biden iyo Xi Jinping oo soo afjaray farqi u dhaxeeyay 7 bilood
-
WARIYAHA WASHINGTON GAROWE ONLINE
- Posted On 10-09-2021, 12:20PM
WASHINGTON, USA - Madaxweynaha Mareykanka, Joe Biden, iyo hogaamiyaha Shiinaha, Xi Jinping, ayaa ku wada hadlay khadka taleefanka, sida ay xaqiijisay warbaahinta maxaliga ee labada wadan.
Labada hogaamiye ayaa soo afjaray ku dhawaad toddobo bilood oo wax xiriir toos ah aysan sameyn. Mareykanka iyo China waa labada dal ee ugu dhaqaalaha badan guud ahaan aduunka.
Wadaxaajoodka ayaa bayaan rasmi ah waxaa ku xaqiijiyay Aqalka Cad iyo warbaahinta dowladda Shiinaha, oo sheegay in labada nin ay wada hadleen subaxnimadii Jimcaha maanta ah.
Wadahadalka, oo socday ku dhawaad 90 daqiiqo, ayaa diirada lagu saaray sidii loo heli lahaa waddo loo maro xiriirka Mareykanka iyo Shiinaha, sida laga soo xigtay war-saxaafadeedka Aqalka Cad.
Wasaaradda arrimaha dibadda Shiinaha oo tibaaxdey in wicitaanka uu ka yimid Biden ayaa xustey in labada hogaamiye ay isla soo qaadeen sidii xal loogu heli lahaa qodobada ay ku kala aragti-duwan yihiin.
Aqalka Cad ayaa intaas ku daray in Biden iyo Xi ay isku raaceen in bog cusub loo furo cilaaqaadka labada dal. Hase ahaatee, ma bixin tafaasiil intaas ka baxsan oo ku saabsan nooca bogga cusub.
Afartii sano ee xukunka uu joogay Donald Trump, xiriirka Mareykanka iyo Shiinaha wuxuu gaarey meeshii ugu xumeyd waxaana uu sii karaar-siiyey tartanka dhanka ganacsiga ee ka dhaxeeya labada dal.
GAROWE ONLINE
