Caalamka oo soo dhaweeyay xabbad-joojinta Mareykanka iyo Iran

TEHRAN — Mareykanka iyo Iran ayaa ku heshiiyay xabbad-joojin laba toddobaad ah, iyadoo wada-hadallo lagu dhameystirayo heshiis nabadeed lagu wado inay Jimcaha ka furmaan Islamabad. Heshiiskan, oo uu ku dhawaaqay Donald Trump, waxa kale oo uu horseedayaa in Iran dib u furto marin-biyoodka muhiimka ah ee Hormuz.

China ayaa sheegtay inay soo dhaweynayso xabbad-joojinta, iyadoo xustay dadaallo diblomaasiyadeed oo ay ku dhiirrigelisay in la joojiyo colaadda. Russia ayaa iyaduna sheegtay in tallaabadu muujinayso fashilka “weerarro gardarro ah” oo ka dhan ahaa Iran.

Ra’iisul Wasaaraha Israel ayaa taageeray hakinta weerarrada Iran, balse wuxuu sheegay in heshiisku uusan khuseyn dagaalka ka socda Lebanon. Dhanka kale, QM ayaa ugu baaqday dhinacyada inay ixtiraamaan heshiiska si loo gaaro nabad waarta.

Midowga Yurub ayaa ku tilmaantay heshiiska tallaabo muhiim ah oo lagu dejinayo xiisadda, halka dalal ay ka mid yihiin India, France, Japan iyo Australia ay sheegeen in xabbad-joojintu gacan ka geysan karto xasilloonida ganacsiga iyo sahayda tamarta.

Sidoo kale Germany, Spain, Indonesia iyo Malaysia ayaa ugu baaqay dhinacyada inay si buuxda u ixtiraamaan shuruudaha heshiiska si looga hortago dib u soo laabashada colaadda.

Xabbad-joojintan ayaa la filayaa inay hoos u dhigto xiisadda Bariga Dhexe, iyadoo dib u furitaanka Strait of Hormuz uu muhiim u yahay socodka saliidda iyo ganacsiga caalamka, oo si weyn u saameeyay dagaalka.

GAROWE ONLINE