Masar oo sheegtay in taageerada milatari ee Sacuudiga aysan ku jirin weerar ka dhan ah Xuutiyiinta Yemen

Qaahira — Madaxweynaha Masar, Cabdifataax Al-Sisi, ayaa sheegay in taageerada milatari ee dalkiisu siin karo Sacuudi Carabiya ay ku koobnaan doonto difaaca dhulka iyo xuduudaha boqortooyada, isla markaana aysan ku jiri doonin weerarro ka dhan ah Yemen, sida ay Arbacadii sheegtay madaxtooyada Masar.

Hadalkan ayaa imanaya xilli kooxda Xuutiyiinta ee ay taageerto Iran ay kordhisay weerarrada ka dhanka ah Sacuudiga, iyadoo colaadda Bariga Dhexe ay sii xoogeysanayso, kana walaac laga qabo saameynta ay ku yeelan karto amniga gobolka iyo sahayda tamarta adduunka.

Al-Sisi ayaa sheegay in Masar ay difaaci doonto dhulka Sacuudiga, balse aysan ka qeyb qaadan doonin weerarro ka dhan ah Yemen. Waxa uu sidoo kale sheegay in Qaahira ay difaaci karto dhulka dal kale oo Carbeed haddii laga codsado, iyadoo hawlgal kasta oo milatari uu ku koobnaan doono ilaalinta dhulka iyo amniga dalka ay taageerayso.

Hadalka madaxweynaha Masar ayaa yimid xilli wasiirka arrimaha dibadda ee dalkaas, Badr Abdelatty, iyo madaxa sirdoonka, Hassan Rashad, ay magaalada Riyadh kula kulmeen Dhaxal-sugaha Sacuudiga, Maxamed Bin Salmaan.

Wakaaladda wararka Sacuudiga ee SPA ayaa sheegtay in Abdelatty uu dhaxal-sugaha gaarsiiyay farriin qoraal ah oo ka timid Al-Sisi, taas oo ku saabsan xoojinta xiriirka labada dal iyo xaaladaha gobolka.

Wasaaradda arrimaha dibadda Masar ayaa bayaan ay soo saartay ku sheegtay in farriintu ay xaqiijisay garab istaagga buuxa ee Masar ay u hayso Sacuudiga, iyo sida ay uga go’an tahay taageeridda amniga iyo xasilloonida boqortooyada.

Dhanka kale, baarlamaanka Masar ayaa Isniintii dib u dhigay ilaa 26-ka Oktoobar cod loo qaadi lahaa oggolaanshaha ciidamada qalabka sida inay taageeraan Sacuudiga haddii codsi rasmi ah loo soo gudbiyo, sida ay sheegeen xildhibaanno.

Taageero milatari oo toos ah oo Masar siiso Sacuudiga waxay noqon kartaa tallaabo sii ballaarin karta colaadda gobolka, oo ay ku lug leeyihiin Mareykanka, Israa’iil iyo Iran. Weerarradii Mareykanka iyo Israa’iil ay ku qaadeen Iran bishii Febraayo ayaa horseeday dagaal saameeyay amniga gobolka, suuqyada shidaalka iyo sahayda tamarta caalamka.

Dagaalka Yemen ayaa isaguna sii xoogeysanayay toddobaadyadii la soo dhaafay, iyadoo isbahaysiga uu Sacuudigu hoggaamiyo ee taageera dowladda Yemen ee caalamku aqoonsan yahay uu weli wajahayo Xuutiyiinta, kuwaas oo gacanta ku haya caasimadda Sanca iyo qaybo badan oo waqooyiga dalkaas ah.

Masar iyo Sacuudiga ayaa leh xiriir istaraatiiji ah iyo mid dhaqaale oo dhow. Sacuudiga iyo dalal kale oo Khaliijka ah, oo ay ku jirto Imaaraadka Carabta, ayaa Masar siiyay balaayiin doollar oo gargaar dhaqaale, lacag lagu xoojiyo bangiga dhexe iyo maalgashi tan iyo markii milatariga Masar uu xukunka ka tuuray madaxweynihii Islaamiga ahaa Maxamed Mursi sannadkii 2013.

Al-Sisi ayaa madaxweyne noqday sannadkii xigay.

Masar ayaa hore ugu biirtay isbahaysiga uu Sacuudigu hoggaamiyo ee faragelinta milatari ka sameeyay Yemen sannadkii 2015, si uu u taageero dowladda dalkaas dagaalka kula jirtay Xuutiyiinta. Hase yeeshee, doorka ciidamada Masar ee dagaalka tooska ah ayaa ahaa mid xaddidan.

Hadallada cusub ee Al-Sisi ayaa muujinaya in Qaahira ay doonayso inay taageerto amniga Sacuudiga, iyadoo isku dayaysa inay ka fogaato ka qeybgalka weerarro ka dhan ah Yemen oo sii ballaarin kara dagaalka gobolka.

GAROWE ONLINE