Cambaareyn ka dhalatay wasiir Yahuud ah oo galay masjidka Al-Aqsa

Wadamada Carabta ayaa talaabadan waxay ku tilmaameen "xadgudub bareer ah iyo daandaansi".

NAIROBI, Kenya - Jordan, Qatar iyo Masar ayaa cambaareeyay weerarka wasiirka amniga qaranka Israa’iil Itamar Ben-Gvir uu ku qaaday dhismaha Masjidka Al Aqsa ee ku yaalla bariga magaalada la haysto ee Quddus.

Wasiirka midigta-fog ayaa xoog ku galay masjidka subaxnimadii hore ee Axadda, taasoo ah booqashadii labaad ee noocan oo kale ah tan iyo markii uu ku biiray xukuumadda Ra'iisul Wasaare Benjamin Netanyahu dabayaaqadii sannadkii hore.

Isagoo ku sugan gudaha goobta, Ben-Gvir ayaa wuxuu ku andacooday lahaanshaha Israa'iil ee dhismahan kadib fariin muuqaal ah oo uu ku duubay barxadda masaajidka.

Wasaaradda Arrimaha Dibadda ee Urdun oo war-saxaafadeed adag soo saartey ayaa waxay ku tilmaantay faragelinta Ben-Gvir ee dhismaha Al Aqsa “daandaansi khatar ah”.

"Tani waa tallaabo daandaansi ah oo la cambaareeyey iyo koror khatar ah oo aan la aqbali karin," ayuu afhayeenka wasaaradda Sinan Majali ku yiri hadal uu soo saaray.

Majali ayaa xusay in faragelintan "ay ka dhigan tahay ku xad-gudbi bareer ah oo sharciga caalamiga ah, iyo maqaamka taariikheed iyo tan sharciga ah ee ka jirta Yeruusaalem iyo goobaheeda quduuska ah".

Maqaamka gaarka ah ee dhismahan ayaa waxa uu u ogolaanayaa Muslimiinta inay ku cibaadaystaan ​​dhismaha Al Aqsa halka kuwa kale ee raacsan diimaha kale u fasaxayo kaliya in ay booqasho ku tagaan isla goobtaan taariikhiga ah.

GAROWE ONLINE