Dal Afrikaan ah oo codsaday in dambiyo dagaal loo maxkamadeeyo madaxda Israa’iil
-
GAROWE ONLINE XAFIISKA MUQDISHO
- Posted On 11-11-2023, 06:39AM
JOHANNESBURG (GO) - Koonfur Afrika ayaa Jimcihii ugu baaqday Maxkamadda Caalamiga ah ee Dambiyada in ay baaritaan ku sameyso madaxda Israa’iil ee dambiyada dagaal iyo xasuuqa ka geystay marinka Qasa.
Wasaaradda Arrimaha Dibadda ee Koonfur Afrika ayaa u yeertay safiirka Israa’iil si ay uga gudbiyaan cabshasooda ku aadan waxay ku tilmaantay hab-dhaqankooda la xiriira dagaalka Qasa.
Horaantii todobaadkan, Koonfur Afrika waxay dib ugu yeertay dhammaan dublamaasiyiinteeda u fadhiya Israa'iil.
Koonfur Afrika ayaa ugu baaqday Qaramada Midoobay in Qasa la geeyo ciidan ilaaliya dadka rayidka ah ee halkaasi ku sugan.
Duqeymahan Israa'iil oo socday muddo bil ah ayaa ku dhintay in ka badan 11,000 oo Falastiiniyiin ah oo u badan carruur iyo dumar.
GAROWE ONLINE
