France: Dad ku dhintey toogasho ka dhacay bartamaha Paris

Eedeysanaha oo 69 jir ah ayaa si degdeg ah loo xiray, waxaana durba soo baxday in xabsiga laga sii daayay dhawaan.

PARIS, Faransiiska - Nin hubeysan ayaa rasaas ku furay dad joogay bartamaha magaalada caasimada ah ee Paris, halkaasi oo uu ku dilay saddex qof, saddex kalena dhaawacay.

Dableyga weerarka geystay ayaa beegsaday xarun ay leeyihiin Kurdiyiinta, waxaana uu toogtay xubno ka tirsan bulshada deegaanka. Ujeedo cunsurinimo oo suurtagal ah ayaa la baarayaa.

Eedeysanaha oo 69 jir ah ayaa si degdeg ah loo xiray, waxaana durba soo baxday in xabsiga laga sii daayay dhawaan, sidda laga soo xigtey warbaahinta maxaliga ah.

Kadib toogashadda dhimashada sababtey, iska horimaadka ayaa markii dambe wuxuu dhex maray ciidamada booliska iyo koox ku soo xoomay goobta uu weerarku ka dhacay.

Rabshadaha ayaa yimid kadib markii nin ay ku sheegeen dad goob joogayaal ah inuu ahaa mid dheer, cadaan iyo waayeel ah, uu toogasho ku dilay labo nin iyo haweeney aagga Rue d'Enghien oo ku taal xaafada 10-aad ee magaalada Paris.

Ma jirto sabab la xaqiijiyay oo keentey toogashada, balse dacwad oogaha Paris, Laure Beccuau, ayaa tibaaxdey in tuhmanaha horay loogu soo eedeeyay rabshado isir nacayb ah.

Dhacdadaas - oo uu seef ku weeraray teendhooyin ku yaal xero muhaajiriin ah oo ku taal Paris - waxay ka dhacday Bercy 8 Diseembar 2021. Ma cadda sababta dhawaan loo sii daayay.

GAROWE ONLINE