Germany: gabdho looga shekiyey inay ku biiri lahaayeen IS oo la qabtay
-
- Posted On 22-10-2014, 04:30AM
October 22, 2014 (GO)- Dalka Jarmalka waxaa lagu qabtay saddex gabdhood oo ka tegey magaalada Denver ee dalka Maraykanka islamarkaana la baadigoobayey sadexdii asbuuc ee ugu dambeeyey kadib markii looga shekiyey inay u safreen dalka Turkey si ay ugu biiraan kooxda IS.
Saddexda gabdhood oo labo asalkoodu Soomaali yahay midda kalena dalka Sudan kasoo jeedo waxaa dib loogu soo celiyey Maraykanka si ay qaraabadooda ula midoobaan.
Mas'uuliyiin ka tirsan hay'adaha sirdoonka Maraykanka oo la hadlay VOA ayaa beeniyey inuu jiro xiriir ka dhexeeya saddexda gabdhood iyo kooxda xagjirka ah ee IS oo ku xooggan dalalka Syria iyo Ciraaq.
Af-hayeen u hadashay xafiiska FBI-da ee magaalada Denver oo lagu magacaabo Suzie Payne ayaa xaqiijisay in gabdhaha dib loogu celiyey qaraabadooda, iyadoo intaas raacisay in soo celintooda FBI-du qayb weyn ka qaadatay.
Magaalada Denver ee gobolka Calorado waxaa ku nool boqollaal Soomaali ah. Badi dadkaasi waxay ka shaqeeyaan wershadaha, gaar ahaan kuwa hilibka lagu qasacadeeyo.
Horay waxaa kooxda IS ugu biiray tobannaan dhallinyaro ah oo ka tegey Maraykanka iyo Yurub, kuwaasoo ay ku jireen qaar badan oo asalkoodu Soomaali yahay.
GAROWE ONLINE
