Golaha Guud ee Qaramada Midoobay oo shir degdeg ah yeelanaya
-
WARIYAHA CAALAMKA GAROWE ONLINE
- Posted On 05-10-2022, 03:38AM
NEW YORK, United States - Golaha loo dhan yahay ee Qaramada Midoobay ayaa qaban doona kulan degdeg ah 10-ka Octoobar kaas oo ku saabsan qabsashada sharci darada ah ee Ruushka ku galay dhulka Ukraine, sida uu sheegay afhayeen u hadlay.
Codsiga kulanka Ukraine iyo Albania ayaa imaanaya kadib markii Ruushka uu diidey qaraar golaha ammaanka ee Qaramada Midoobay uu ku cambaareeyey aftidii "sharci-darrada ahayd" ee Moscow ay taageertay ee lagu doonayay in lagula wareego qaybo ka mid ah bariga Ukraine.
Aftida iyo ku biiristii uu ku dhawaaqay madaxweynaha Ruushka Vladimir Putin ayaa waxaa si weyn u cambaareeyay beesha caalamka.
193-ka xubnood ee Golaha loo dhan yahay ayaa ka doodi doona la wareegida afar gobol oo Yukreeniyaan ah -- Donetsk, Luhansk, Zaporizhzhia iyo Kherson -- taasoo xadgudub ku ah sharciga caalamiga ah.
Sidoo kale qaraar ay soo diyaariyeen Midowga Yurub ayaa ku saabsan in hay’adda Qaramada Midoobay ay ka fiirsato in Ruushka laga go’doomiyo beesha caalamka haddii loo codeeyo, sida ay sheegeen dublamaasiyiintu.
Madaxweynaha Ukraine Volodymyr Zelenskyy ayaa dalbaday in Ruushka laga saaro dhammaan ururada caalamiga ah.
GAROWE ONLINE
