Hogaamiyayaasha Carabta iyo Muslimiinta oo taageeray qorshe Israel kula wareegayso Gaza

Boqorka Urdun, Cabdalla, ayaa sheegay inay jirto “heshiis ballaaran” oo dhex mara hogaamiyayaasha Carabta iyo Muslimiinta ku saabsan qorshaha madaxweyne Donald Trump ee joojinta dagaalka Gaza.

Boqorka ayaa hadalkan ka sheegay shir dhacay Axaddii, kaas oo uu kula yeeshay ra’iisul wasaarayaashii hore ee dalka, xarunta Al Husseiniya ee magaalada Amman, halkaas oo uu kaga hadlay horumarrada gobolka iyo natiijada safarkiisii New York uu ku tagay si uu uga qeyb galo Golaha Guud ee Qaramada Midoobay.

Sida lagu sheegay bayaan ka soo baxay maxkamadda boqortooyada, Cabdalla ayaa booqashadiisa New York ku tilmaamay mid “wax ku ool ah,” isagoo cadeeyay in Urdun “si buuxda ugu diyaar tahay inay ilaaliso madaxbannaanideeda iyo ammaankeeda.”

Urdun “waxay si dhow ula shaqaynaysaa Carabta iyo la-hawlgalayaasha kale ee firfircoon si loo faahfaahiyo qorshe ballaaran oo ku saabsan Gaza kaasoo usbuucii hore soo bandhigay madaxweyne Donald Trump inta lagu guda jiray kulan dhinacyo badan ah oo ay yeesheen hogaamiyayaasha Carabta iyo Muslimiinta.”

Boqorka ayaa intaas ku daray in faahfaahin badan oo ka mid ah qorshahan “ay waafaqsan yihiin wixii la isku raacay.”

Qorshaha Nabadda ee Trump oo ka kooban 21 qodob

Taariikhdu markay ahayd 25 Sebtembar, Trump ayaa soo bandhigay qorshe nabadeed oo ka kooban 21 qodob oo loogu talagalay hogaamiyayaasha Muslimiinta, kaasoo ku baaqaya joojinta dagaalka ee joogtada ah ee Gaza, sii deynta dhammaan maxaabiista Israa’iil, maamulka Gaza oo aan Hamas ku jirin, iyo in ciidamada Israa’iil si tartiib tartiib ah uga baxaan xerada Gaza, sida warar warbaahineed ay sheegeen.

Hogaamiyayaasha Carabta ayaa taageeray qaybo badan oo qorshahan ka mid ah, balse waxay codsadeen in la sii kordhiyo qodobo dheeraad ah oo ay ka mid yihiin dammaanad qaadida in la joojiyo ku biirinta dhulka galbeedka oo la haysto, ilaalinta xaaladda Yeruusaalem, kordhinta gargaarka bini’aadantinimo, iyo wax ka qabashada degmooyinka sharci-darrada ah ee Israa’iil, sida ay u sheegeen diblomaasiyiin goboleed oo CNN la hadlay.

GAROWE ONLINE