Hoggaamiyaha Sare ee Iran: Aargudashada Aabbahay Waa Waajib In La Fuliyo

Tehran – Mojtaba Khamenei, oo ah wiilka Hoggaamiyaha Sare ee Iiraan, ayaa farriin qoraal ah ku sheegay in aargudashada loo qaado aabbihii la dilay ay tahay rabitaanka shacabka Iiraan, isagoo carrabka ku adkeeyay in arrintaasi ay tahay mid "hubaal ah in la fulin doono."

Qoraalka uu soo saaray, Mojtaba ayaa sheegay in shacabka Iiraan ay dalbanayaan jawaab adag oo ka dhan ah cidda uu ku eedeeyay inay ka dambeysay dilka aabbihii, isagoo xusay in tallaabo kasta oo aargoosi ah ay tahay waajib qaran oo aan dib loo dhigi karin.

"Waa dalabka shacabka in loo aargudo hoggaamiyahooda. Arrintaasna waa in si dhab ah loo fuliyaa," ayuu ku yiri farriintiisa, isaga oo aan bixin faahfaahin ku saabsan nooca tallaabooyinka ay Iiraan qaadi karto ama waqtiga la fulinayo.

Hadalkan ayaa imanaya xilli gobolka Bariga Dhexe uu wajahayo xiisad aad u sarreysa, iyadoo ay sii kordhayaan walaacyada ku saabsan in Iiraan ay qaadi karto weerarro aargoosi ah oo ka dhan ah cadowgeeda, taasoo khatar gelin karta amniga gobolka.

Illaa iyo hadda, ma jiro wax war ah oo rasmi ah oo ka soo baxay dowladda Iiraan oo faahfaahinaya tallaabooyinka ay qorsheyneyso, hase yeeshee hadalka Mojtaba Khamenei ayaa loo fasiranayaa inuu muujinayo mowqif adag oo ku saabsan jawaabta ay Tehran ka bixin doonto dilka hoggaamiyihii sare ee dalka.

GAROWE ONLINE