Hoggaanka Pakistan oo soo gebagebeeyay safar xal loogu raadinayo dagaalka Bariga Dhexe

ISLAMABAD — Ra’iisul Wasaaraha Pakistan, Shehbaz Sharif, iyo Taliyaha Ciidanka Xoogga dalkaas, Field Marshal Asim Munir, ayaa soo gebagebeeyay socdaallo kala duwan oo ay ku kala bixiyeen dalalka Iran iyo Turkiga, kuwaas oo qayb ka ah dadaallada caalamiga ah ee lagu doonayo in lagu qaboojiyo xiisadda u dhaxeysa Maraykanka iyo Iran.

Field Marshal Asim Munir ayaa maanta oo Sabti ah ka soo laabtay booqasho saddex maalmood qaadatay oo uu ku joogay magaalada Tehran, halkaas oo uu kula kulmay madaxda ugu sarreysa dalkaas oo ay ka mid yihiin Madaxweynaha, Wasiirka Arrimaha Dibadda, iyo Guddoomiyaha Baarlamaanka.

Bayaan ka soo baxay milatariga Pakistan ayaa lagu sheegay in booqashadani ay muujinayso go’aanka adag ee Pakistan ay ku fududaynayso heshiis lagu gaaro wadahadal iyo horumarinta nabadda gobolka.

Dhanka kale, Ra’iisul Wasaare Shehbaz Sharif ayaa isna dib uga soo laabtay dalka Turkiga ka dib markii uu ka qayb galay madal diblomaasiyadeed oo ka dhacday magaalada Antalya, isagoo horay u soo maray dalalka Sacuudi Carabiya iyo Qatar si uu u xoojiyo geeddi-socodka nabadda.

Sharif ayaa farriin uu soo dhigay bartiisa X ku sheegay inuu ka soo laabtay Turkiga isagoo wada ballanqaad cusub oo ku saabsan xoojinta iskaashiga gobolka iyo horumarinta wadahadallada lagu raadinayo nabad waarta.

Dadaalladan ayaa imanaya xilli cadaadis xooggan uu ka dhashay xiritaanka mar kale ee Marinka Hormuz, taas oo Iran ay ku eedaysay Maraykanka inuu jebiyay heshiiskii furitaanka marinkaas ee qaybta ka ahaa xabbad-joojinta.

Madaxweynaha Maraykanka, Donald Trump, ayaa dhankiisa sheegay in wareegga labaad ee wadahadallada Iran lagu qaban karo dalka Pakistan maalmaha soo socda, isagoo ammaanay doorka uu Field Marshal Asim Munir ka ciyaarayo dhex-dhexaadinta labada dhinac.

Wadahadalladii hore ee ka dhacay Islamabad ayaa ku dhammaaday heshiis la'aan, waxaana xabbad-joojinta hadda jirta ay ku eg tahay 22-ka Abriil, 2026. Iyadoo muddo kooban ay naga xigto xilligaas, dunida ayaa indhaha ku haysa in dadaallada Pakistan ay horseedi doonaan heshiis rasmi ah oo looga baaqsan karo iska hor-imaad ballaaran oo ka qarxa biyaha Gacanka.

GAROWE ONLINE