Ilhan Omar oo sheegtay inaysan aamusi doonin kadib markii la baaray gurigeeda

WASHINGTON, D.C. — Saraakiil ka tirsan dowladda federaalka Mareykanka ayaa Isniintii baaritaan ka sameeyay guriga xildhibaanadda Ilhan Omar ee ku yaalla agagaarka Washington, D.C., iyadoo tallaabadan ay qayb ka tahay baaritaan dambiyeed oo socda, sida ay xaqiijisay Waaxda Caddaaladda Mareykanka.

Ilhan Omar, oo ka tirsan Xisbiga Dimuqraadiga lagana soo doorto gobolka Minnesota, ayaa cambaareysay baaritaanka, iyadoo ku tilmaantay tallaabo kale oo ka mid ah waxa ay ku sheegtay olole cabsi-gelin ah oo uu Madaxweyne Donald Trump ku hayo.

“Ma aamusi doono,” ayay tiri Ilhan Omar, iyadoo baaritaanka ku tilmaantay mid sii xoojinaya cadaadiska siyaasadeed ee ay sheegtay in lagu hayo.

Waaxda Caddaaladda ayaa sheegtay in saraakiisha Hay’adda Baaritaannada Amniga Gudaha (HSI), oo hoos tagta Waaxda Amniga Gudaha, ay fuliyeen amar baaritaan oo maxkamad oggolaatay. Wasaaraddu faahfaahin kama bixin nooca dambiga la baarayo ama caddeymaha la doonayo in la helo.

Warbaahinta Mareykanka ayaa sheegtay in baaritaanka lala xiriirin karo tuhunno hore oo ku saabsan dukumentiyada socdaalka Omar, balse dowladda si rasmi ah uma xaqiijin in arrintaasi ay tahay sababta baaritaanka. Omar ayaa hore u beenisay eedeymaha la xiriira khiyaanada socdaalka, iyadoo ku tilmaantay eedeymo aan sal lahayn.

Baaritaanka ayaa dhacay saddex toddobaad ka hor doorashada xilliga dhexe ee Mareykanka ee bisha Nofeembar, taas oo Ilhan Omar ay mar kale u tartamayso kursigeeda Aqalka Wakiillada. Waqtiga uu baaritaanku dhacay ayaa dhaliyay su’aalo siyaasadeed, iyadoo hoggaamiyeyaasha Dimuqraadigu ay cambaareeyeen tallaabada.

Hoggaamiyeyaasha sare ee Dimuqraadiga ee Aqalka Wakiillada ayaa bayaan ay soo saareen ku sheegay in Ilhan Omar muddo dheer bartilmaameed u ahayd weerarro shaqsiyeed iyo eedeymo ay ku tilmaameen kuwo aan sal lahayn. Waxay sidoo kale su’aal geliyeen fulinta baaritaanka xilli ay doorashadu soo dhowdahay.

Madaxweyne Trump iyo saraakiil kale oo ka tirsan xisbiga Jamhuuriga ayaa sannado badan dhaleeceyn u jeedinayay Ilhan Omar, iyagoo su’aalo ka keenay taariikhdeeda socdaalka iyo aragtideeda siyaasadeed. Madaxweyne ku-xigeenka Mareykanka JD Vance ayaa bishii May sheegay in maamulka uu baarayo eedeymo la xiriira socdaalka Ilhan Omar, kuwaas oo ay xildhibaanaddu beenisay.

Ilhan Omar, oo asal ahaan ka soo jeedda Soomaaliya, ayaa markii ugu horreysay loo doortay Aqalka Wakiillada Mareykanka sannadkii 2018. Waxay matashaa degmada shanaad ee Minnesota, oo ay ku jirto magaalada Minneapolis, waxayna ka mid tahay xildhibaannada garabka horumarka ee Dimuqraadiga ee sida weyn uga soo horjeeda siyaasadaha Trump.

Ilaa hadda, dowladda Mareykanka ma shaacin goorta baaritaanku dhammaanayo ama in tallaabo sharci oo dheeraad ah laga qaadi doono xildhibaanadda.

GAROWE ONLINE