Iran Oo U Ogolaatay Maraakiibta Malaysia Inay Ka Gudbaan Marinka Hormuz

TEHRAN — Iran ayaa u ogolaatay maraakiibta Malaysia inay ka gudbaan marinka muhiimka ah ee Strait of Hormuz, sida uu sheegay ra’iisul wasaaraha Malaysia, xilli ay jirto qalalaase tamareed oo caalami ah oo ka dhashay dagaalka u dhexeeya United States, Israel iyo Tehran.

Khudbad telefishan laga sii daayay Khamiistii, Ra’iisul Wasaaraha Anwar Ibrahim ayaa uga mahadceliyay Madaxweynaha Iran, Masoud Pezeshkian, inuu siiyay maraakiibta Malaysia “ogolaansho degdeg ah” oo ay ku maraan marin-biyoodka, kaasoo si wax ku ool ah ay Tehran u xirtay.

“Waxaan ku guda jirnaa dadaallo lagu sii deynayo maraakiibta shidaalka ee Malaysia iyo shaqaalaha la socda si ay u sii wataan safarkooda kuna laabtaan dalkooda,” ayuu yiri Anwar.

Ra’iisul wasaaruhu ma uusan faahfaahin tirada maraakiibta ka gudubtay marinka, ama shuruudaha lagu siiyay marin ammaan ah. Marinkan ayaa caadi ahaan fududeeya gaadiidka ku dhowaad shan meelood meel sahayda saliidda iyo gaaska dareeraha ah ee dunida.

Malaysia, oo caan ku ah siyaasaddeeda dhexdhexaadnimada, si degdeg ah uga jawaabin arrintan faahfaahin dheeri ah. Si kastaba, Anwar ayaa sheegay in inkastoo dalka uu saameeyay carqaladda sahayda tamarta, haddana uu ku jiro “xaalad ka wanaagsan” dalal kale, taasoo uu ku sababeeyay awoodda shirkadda tamarta dowladda ee Petronas.

Malaysia waa mid ka mid ah dhoofiyeyaasha ugu waaweyn gaaska dabiiciga ah ee dareeraha ah, balse waxay ka soo dejisaa ku dhowaad 70% saliidda ceyriinka ah gobolka Khaliijka. Anwar ayaa sheegay in dowladdiisu qaadi doonto tallaabooyin lagu yareynayo isticmaalka shidaalka, oo ay ka mid yihiin dhimista qoondada bishiiba ee shidaalka la kabo iyo in si tartiib tartiib ah shaqaalaha dowladda loogu wareejiyo nidaamka shaqada guriga.

GAROWE ONLINE