Israa’iil: Ma Doonayno Dagaalka Turkiga, Balse “Xariiqdii Cas” Waa Laga Gudbay

TEL AVIV — Danjiraha Israa’iil u fadhiya Mareykanka, Leiter, ayaa sheegay in Israa’iil aysan doonayn inay dagaal la gasho Turkiga ama Suuriya, balse uu sheegay in “xariiqdii cas” laga gudbay.

Leiter ayaa sheegay in Israa’iil ay heshay xog sirdoon oo cad oo muujinaysay in Turkigu qorsheynayay inuu si weyn u ballaariyo joogitaankiisa militari ee Suuriya.

Wuxuu sheegay in xogtaasi ay soo baxday ka hor intii aan Israa’iil weerar ku qaadin saldhigga diyaaradaha ee Abu al-Duhur ee Suuriya. Sida uu sheegay, Israa’iil waxay tallaabadaas u qaaday iyadoo ka jawaabaysa waxa ay u aragtay khatar ka dhalan karta ballaarinta ciidamada Turkiga ee Suuriya.

Danjiraha ayaa sheegay in Israa’iil ay weli diyaar u tahay inay Turkiga la hadasho sidii looga fogaan lahaa dagaal toos ah.

“Dhab ahaantii waxaan diyaar u nahay wada-hadal aan la yeelanno Turkiga,” ayuu yiri Leiter. Hase yeeshee, wuxuu ku eedeeyay Turkiga inuu leeyahay mowqif aad u adag oo ka dhan ah Israa’iil.

Leiter ayaa sidoo kale sheegay in Turkigu doonayo in Israa’iil “laga tirtiro khariidadda”, isaga oo hadalkaas ku tilmaamay mid muujinaya khatarta uu dalkiisu ka dareemayo siyaasadda Ankara.

Dagaalka iyo khilaafka siyaasadeed ee u dhexeeya Israa’iil iyo Turkiga ayaa kusoo beegmaya xilli labada dal ay isku khilaafsan yihiin arrimaha amniga iyo joogitaanka ciidamada shisheeye ee Suuriya.

Haddaladda Leiter ayaa muujinaya in Israa’iil ay doonayso inay ka fogaato dagaal toos ah oo ay la gasho Turkiga, inkastoo ay sii kordhayaan khilaafaadka labada dal ee ku saabsan xaaladda Suuriya.

GAROWE ONLINE